IN MEMORIAM, ndërroi jetë gazetari dhe shkrimtari Mustafa Spahiu

Mustafa Spahiu u lind me 5 prill 1948 në Muçivërcë të Gjilanit. Katër klasë të shkollës fillore i kreu në vendlindje, tetëvjeçaren në Rogoçicë, të mesmen në Prishtinë. Me pas kreu Akademinë Pedagogjike në Shkup. Ai ndoqi studimet në Fakultetin Filologjik, katedrën e gjuhës e letërsisë shqipe. Vjershën e parë e botoi me 21 mars 1965 në "Flaka për fëmijët tanë". 

 

Tërë profesionin e gazetarit, publicistit e kaloi në Radio Shkupi – Programi në Gjuhën Shqipe ku  për 25 vjet me drejtoi me sukses emisionin për fëmijë "Lule më lule" dhe  mbi 14 vjet emisionin letrar "Tingulli i artë i fjalës". Ka marrë shumë shpërblime letrare e mirënjohje nga shumë institucione dhe asociacione të fëmijëve, në shkallë republike dhe jashtë vendit. Më vitin 2008, programi i Radio Shkupit , ia akordoi mirënjohjen më të lartë për ” Vepër jetësore”. 

 

Në takimet letrare të organizuara nga Shoqata e artistëve "Pushkin" në Tetovë u nderua me çmim të parë. Ka të përkthyera mbi 30 vepra nga gjuhët sllave dhe nga shqipja në këto gjuhë. Ai ishte anëtar i Shoqatës së shkrimtarëve shqiptarë dhe Shoqatës së shkrimtarëve në RMV , ishte anëtar i Klubit të shkrimtarëve "Konstandin Kristoforidhi" të Elbasanit,  qytetar nderi i qytetit të Durrësit dhe Mik i madh i fëmijëve, akorduar nga prefektura e qytetit të Durrësit. Pas 41 vjet shtazh pune u pensionua por pa e ndaluar veprimtarinë krijuese . 

 

TVM 2 i shpreh ngushëllime të sinqerta familjes për humbjen e thellë.