Kovid 19: BE më shumë të vaksinaur se SHBA-të

Bashkimi Evropian tejkaloi Shtetet e Bashkuara të Amerikës sa i përket normës të vaksinimit derisa bota po përballet me një valë të re të infektimeve, të shkaktuar nga varianti Delta të virusit korona.

 

Rreth 55.5 për qind e popullatës së përgjithshme të BE-së tashmë kanë marrë të paktën një dozë të vaksinës, krahasuar me 55.4 për qind në Shtetet e Bashkuara, thuhet në të dhënat e Our World in Data.

 

“BE-ja gjatë kësaj jave ka tejkaluar SHBA-në si kontinent që ka administruar më së shumti doza të para”, tha komisioneri Tierry Breton.

 

BE-ja ishte kritikuar në fillim të vitit, për shkak të një fushate të ngadaltë të vaksinimit. Ndërkaq, SHBA-ja kishte pasur një nisje të vrullshme të fushatës së imunizimit, por së fundmi vaksinimi është ngadalësuar, kryesisht për shkak të hezitimit për të marrë vaksina.

 

Pavarësisht numrit të lartë të të vaksinuarve në BE dhe SHBA, janë rritur shqetësimet për një valë të re të virusit, për shkak të variantit Delta, i cili është më ngjitës. Ekspertët shëndetësorë kanë thënë se rreziku kryesor është te personat e pavaksinuar.

 

Mbi 99 për qind e vdekjeve nga COVID-19 dhe 97 për qind e hospitalizimeve janë në mesin e personave të pavaksinuar, thuhet në të dhënat e Qendrave amerikane për Kontrollin dhe Parandalimin e Sëmundjeve.

 

Në dy javët e fundit, në baza ditore në SHBA janë regjistruar pothuajse 30.000 raste të reja. Ndërkaq, në BE, autoritetet shëndetësore kanë paralajmëruar se blloku mund të goditet nga një valë e re e infektimeve në fillim të gushtit. Për shkak të një vale eventuale, shumë vende kanë ashpërsuar masat.