Fokusi mbetet tek imunizimi masiv, KSI: Nuk rekomandon masa të reja

Edhe krahas rritjes së rasteve pozitive dhe alarmit nga varianti indian, Komisioni nuk ka rekomanduar as lehtësim dhe as ashpërsim të masave anti-Covid, njoftojnë nga Ministria e Shëndetësisë.

Në fuqi do të vazhdojnë të jenë masat e njëjta restriktive. Nga MSH thonë se Komisioni ka konstatuar rritje të lehtë të rasteve pozitive dhe testimeve për COVID-19 në Shkup dhe Tetovë, dhe fokusi duhet të mbetet tek imunizimi i popullsisë.

Në këtë drejtim, prej sot ka filluar vaksinimi i fëmijëve të moshës prej 12 deri 17 vjeç.

Sipas të dhënave të fundit janë të paraqitur rreth 1.800 fëmijë. Fëmijët kanë ardhur për t’u vaksinuar me sugjerimet e prindërve, por edhe me pajtimin e vetë atyre.

“Me ndihmën e të dyja palëve kam vendosur që të vij të vaksinohem. Unë jam 17 vjeç, nuk di nëse shokët e mi do të vaksinohen edhe pse duhet të vijnë edhe ata për t’u vaksinuar.”,- tha një fëmijë 17 vjeç.

Filloi vaksinimi i fëmijëve 12-17 vjeç, prindërit: Adoleshentët duhet vaksinuar

Prindërit kanë qenë iniciatorët më të mëdhenj për fëmijët e tyre që të vaksinohen, ata thonë se bëhet fjalë për  të mirën e shëndetit të tyre.

“Ne si familje së bashku kemi vendosur. Shohim se në rrethinë numrat janë në rritje, tani menduam që është koha e duhur për t’u vaksinuar.”,- u shpreh një prind.

“Mendoj që është e nevojshme që të vaksinohet kjo moshë, sepse këta dalin në mbrëmje nëpër diskoteka, shëtisin gjithkund. Së bashku me bashkëshorten kemi vendos që të vaksinojmë fëmijën.”,- theksoi një prind. 

Në Poliklinikën “Jane Sandanski” për veç vaksinimit të fëmijëve paralelisht vazhdon edhe imunizimi i popullatës së rritur.

“Këtu vaksinojmë edhe qytetarët tjerë me “Sinovak”, “Astra Zeneca”, si dhe bëhet rivaksinimi e kështu me radhë.”,- u tha nga“Jane Sandanski”.

Covid, 9 raste të reja, 53 të shëruar e asnjë viktimë

Gjatë 24 orëve të fundit janë kryer 1973 teste dhe janë regjistruar 9 raste të reja të COVID-19. Nuk është regjistruar asnjë humbje jete, ndërsa janë shëruar gjithsej 53 pacientë. Numri i rasteve aktive është 221. (Rejhane Bushi Metaj, TVM2)