Filloi gjykimi për rastin “Dhoma Publike”, Mbrojtja: Prokuroria nuk posedon dëshmi. Prokuroria: Akti është kryer me paramendim

Në Gjykatën Penale filloi gjykimi për rastin “Dhoma Publike”, ndërsa dy të akuzuarit, Darko Kostovski dhe Mihaell Panevski, u sollën nga paraburgimi në Shutkë. Ata akuzohen për veprën penale “prodhim dhe distribuim të pornografisë për fëmijë” si kreatorë dhe administratorë të grupit “Dhoma Publike”.

Avokatët e të akuzuarve ankohen se nuk kanë pasur qasje në dëshmitë e Prokurorisë, që të bëjnë ekspertizë forenzike dhe kompjuterike, dhe kërkuan shtyrje që të përgatisin mbrojtje adekuate.

“Qëndrimi i mbrojtjes për të akuzuarin e parë është se rreth gjashtë muaj është në paraburgim, ndërsa qëndrimi ynë është se Prokuroria për këtë rast nuk ka asnjë dëshmi.”,- deklaroi avokati mbrojtës, Petro Janura.

“Kemi të bëjmë me një temë tejet seksuale dhe Prokuroria që të sjell aktin e akuzës, duhet të posedojë dëshmi kruciale të cilat nuk ekzistojnë dhe këtë do ta shihni  gjatë procedurës.”,- tha avokati mbrojtës, Mirjana Stevanovska.

“Nga eksperti i forenzikës dhe shoqërisë informatike do të dëshmohet se edhe i akuzuari i dytë nuk është kryerës i kësaj vepre penale dhe sipas hierarkisë nëse i akuzuari i parë nuk është fajtor, i akuzuari i dytë nënkuptohet se duhet të jetë i pafajshëm.”,- theksoi  avokati mbrojtës, Ivanka Jakimovska.

Në akuzën e Prokurorisë thuhet se në periudhën prej 19. 12. 2019 deri më 28.01 .2020 dy të akuzuarit në rrjetin social Telegram janë përkujdesur për përmbajtjet tekstuale dhe audio-vizuale të cilat janë shpërndarë tek anëtarësia e grupit.

FLUTURA LATIFI