Han: Vendi i Maqedonisë dhe i vendeve ballkanike është në BE

 

“Republika e Maqedonisë dhe vendet e tjera të Ballkanit Perëndimor do të arrijnë t’i tejkalojnë sfidat dhe të bëhen anëtare të plotfuqishme të Bashkimit Evropian. Zgjerimi i BE-së është pjesë përbërëse e agjendës së Bashkimit Evropian dhe Komisioni Evropian është i gatshëm ta ndihmojë Maqedoninë në zbatimin e procesit të reformave”- ka thënë Han.

 

Ndërkaq, zëvendëskryeministri për Çështje Evropiane, Fatmir Besimi, ka njoftuar komisionerin Han për përpjekjet që i bën Qeveria e Republikës së Maqedonisë në drejtim të zbatimit të reformave të nevojshme për realizimin e suksesshëm të procesit të eurointegrimit në BE. 

 

“Qeveria, duke u bazuar në gjetjet e Raportit për Progres, tanimë ka përgatitur draft-planin e veprimit për aktivitete konkrete në fushat kryesore, siç janë reformat në gjyqësi, e drejta e shprehjes dhe mediave, përmirësimi i marrëdhënieve ndëretnike, reformat në administratën publike, marrëdhëniet e mira ndërfqinjësore dhe bashkëpunimi rajonal, reformat zgjedhore në përputhje me rekomandimet e OSBE/ODIHR-it, shfrytëzimi efektiv i fondeve IPA etj”- tha zëvendëskryeministri, Fatmir Besimi.

 

Zëvendëskryeministri Besimi, ka kërkuar mbështetje më të fuqishme nga eurokomisari Han dhe Komisioni Evropian në Samitin e dhjetorit të Këshillit Evropian.