SHBA njeh emrin “Maqedoni”, Venizelos braktis konferencën

Siç bëjnë të ditur mediat greke, ministri i Jashtëm grek, Evangelos Venizelos, ka braktisur konferencën e mbajtur nga sekretari amerikan i shtetit, Xhon Keri, me ministrat e Jashtëm të vendeve të koalicionit kundër “Shtetit Islamik”.

 

Shkak për këtë veprim është bërë vetë Keri, i cili gjatë përmendjes së emrave të vendeve bashkëpunuese ka thënë "Maqedonia", duke mos përdorur emrin zyrtarë Ish-Republika Jugosllave e Maqedonisë. 

 

Pas konferencës, Ministria e Jashtme greke i ka dërguar edhe një letër zyrtare palës amerikane, ku ankohej për atë veprim të kryer.

 

Në letër thuhej se Venizelos ishte larguar nga konferenca në shenjë proteste, duke qenë se emri i fqinjit verior të Greqisë nuk ishte vendosur ende dhe të dy vendet janë ende në proces bisedimesh. Për më tepër, që edhe në Këshillin e Sigurisë së OKB-së emri nuk është vendosur ende.

 

Sipas Greqisë, Keri nuk ndoqi procedurën formale, duke i thërritur vendet me emrin e tyre zyrtarë. Edhe pse pala maqedonase kishte mbërritur në Bruksel me emrin zyrtarë me të cilin përfaqësohen ndërkombëtarisht, në deklaratën e përbashkët që lëshuan 60 vendet pas takimit, shënohej “Maqedonia”. 

 

Pas largimit të Venizelosit, Greqia u përfaqësua në konferencë nga i dërguari i saj në NATO, Mihalis Diamesis.