Zgjedhjet lokale, pritet shpallja nga Kryeparlamentari Xhaferi

Kryetari i Kuvendit, Talat Xhaferi sot duhet t’i shpallë zgjedhjet lokale, që do të mbahen më 17 tetor të këtij viti.

Duke pasur parasysh që zgjedhjet e mëparshme ishin më 15 tetor të vitit 2017, në fakt nga 15 deri më 18 tetor, përmbushet mandati katërvjeçari i kryetarëve të komunave dhe këshilltarëve dhe ky mandati sipas Kushtetutës dhe Ligjit nuk mund të vazhdohet, përveç në gjendje të jashtëzakonshme ose luftë. 

Më shumë se gjysma e kryetarëve të komunave në raundin e dytë fituan një mandat ose konkretisht 46 komuna, përfshirë Qytetin e Shkupit, kjo do të thotë në fakt se deri më 18 tetor u përfundon mandati katërvjeçar.

Nga shpallja e zgjedhjeve deri në ditën e votimit, duhet të ketë minimum 70 ditë, maksimum 90 ditë dhe në këtë periudhë,  KSHZ  duhet ta përgatisë afatet për kryerjen e aktiviteteve zgjedhore.

Disa nga partitë tashmë kanë dalë me kandidatët e tyre dhe kanë paralajmëruar bashkëpunim për zgjedhjet e ardhëshme lokale.

LSDM ka paralajmëruar  koalicione  me BDI-në, Besa-n dhe PDSH-në, në disa komuna që në rrethin e parë, e në të tjerat në rrethin e dytë.

VMRO-DPMNE opozitare njoftoi se do të dalë me kandidatë të rinj. Opozita shqiptare, koalicioni ASH-AAA,  nuk ka paralajmëruar koalicione për momentin.

Të gjithë kandidatët zyrtarë të partive apo koalicioneve eventuale,  do të shpallen në shtator.

Mbetet e pasigurt nëse procesi zgjedhor do të jetë me rregulla të reja për pragun zgjedhor të kandidatëve të pavarur, të cilat tashmë kanë hyrë në procedurë kuvendore.

Presidenti Stevo Pendarovski e ka bërë të qartë se  nuk do t’i nënshkruajë ndryshimet e Kodit Zgjedhor në formën e tanishme, kryesisht për shkak të pragut prej 2 % për kandidatët e pavarur, por vetëm nëse lidhur me pragun për kandidatët e pavarur , arrihet konsensus më i gjerë midis partive.

Pendarovski thotë se ndryshimet në Kodin Zgjedhor duhet të ishin bërë 6 muaj më parë e jo para zgjedhjeve.

Megjithatë pushteti ka paralajmëruar tashmë se do të ketë ndryshime dhe përmirësime në tekstin e Kodit Zgjedhor e se për këtë, parimisht ka  marrëveshje midis katër partive më të mëdha. Presin  që menjëherë pas pushimeve, në mes të gushtit, ndryshimet të votohen në Kuvend.

Vërejtje në ndryshimet e propozuara shprehën edhe Komisioni Antikorrupsion, Transparensi Interneshënëll dhe disa shoqata civile, të cilët  konsiderojnë se miratimi i ndryshimeve në Kodin Zgjedhor, kaq pranë  fillimit të procesit zgjedhor, është  në kundërshtim me rekomandimet e  OBSE-ODIHR-së dhe të praktikave të mira me të cilat rekomandohet kornizë e qëndrueshme zgjedhore.