Mesdheu në vështirësi, Algjeria e Greqia në flakë, Turqia mes flakëve e përmbytjeve

 

“Nuk kemi mjete. Po përpiqemi me çfarë të mundemi, vetëm të mbrojmë shtëpitë. Zoti qoftë me ne”, shprehet një banor.

 

Presidenti Abdelmadjid Tebboune ka shpallur tri ditë zie. Që prej së hënës, flakët po përpijnë malet me pyje në rajonin e Kabilia, në lindje të kryeqyteti Algjer, duke djegur banesa, tokë bujqësore dhe bagëti.

 

Maroku fqinj, me të cilin Algjeria ka kohë që ka pasur lidhje të tendosura mbi Saharanën Perëndimore, shprehu gatishmërinë për të ndihmuar.

 

Në Tunizinë fqinje të Algjerisë, temperatura në kryeqytetin Tunis arriti një rekord të të gjitha kohërave prej 49 gradë Celsius.Shërbimet e urgjencës tuniziane raportuan 15 zjarre në veri dhe veriperëndim, por pa viktima.

 

Sakaq Turqia është ndarë në dysh, ndërsa jugu është gjunjëzuar nga flakët, veriu përballet me përmbytjet. Shirat e dendur kanë shkaktuar përmbytje dhe rreshqitje të rrezikshme dheu, duke vrarë të paktën 1 person.Të tjerë janë lënduar  apo janë shpallur të humbur. Helikoperët ndërhynë për të shpëtuar personat e bllokuar në çati, ndërsa automjetet u tërhoqën zvarrë nga rryma. Përmbytjet prekën rajonet bregdetare të Bartin, Kastamonu, Sinop dhe Samsun. Meteorologët thonë se një katastrofe e tillë nuk ishte parë në 50 ose 100 vjet.

 

Edhe Greqia po ashtu vijon betejën e mundimshme me flakët. Qindra zjarrfikës nga e gjithë Europa dhe Lindja e Mesme po punojnë krah grekëve për të vënë nën kontroll vatrat në ishullin e Evias, rajonin e Atikës dhe Peloponezit. Të hënën, OKB lëshoi një raport që tregon se si kërcënimi nga ngrohja globale është edhe më akut nga sa mendohej më parë. Ndryshimi i klimës përforcon thatësira, duke krijuar kushte ideale që zjarret e egra të përhapen jashtë kontrollit dhe të shkaktojnë dëme të papara materiale dhe mjedisore.