Afganistan, situatë kaotike, mijra njerëz largohen

 

 

Situata e krijuar, ka detyruar Këshillin e Sigurisë në OKB të mbajë një takim emergjent. Shkelja e të drejtave të njeriut, sidomos e grave, dhe cështja e refugjatëve, janë shqetësimet kryesore. 

 

“U bëj thirrje talebanëve dhe të gjitha palëve të respektojnë dhe mbrojnë të drejtën ndërkombëtare humanitare dhe të drejtat dhe liritë e të gjithë personave. Jam i shqetësuar në mënyrë të veçantë për shkeljen e të drejtave nga grave. Ne nuk mund t’i braktisim afganët në këto moment. I bëj thirrje Këshillit që të përdorë të gjitha mjetet në dispozicion, të ushtrojnë presion për të shtypur kërcënimin terrorist në Afganistan dhe kërkoj nga vendet që të pranojnë refugjatët afganë.”, tha Antonio Guterres, sekretar i përgjithshëm i OKB-së.

 

 

Presidenti Joe Biden, mbrojti vendimin për tërheqjen e trupave nga Afganistani dhe fajin për situatën, ia hodhi qeverisë afgane.

 

“Ne u dhamë çdo shans për të përcaktuar të ardhmen e tyre. Por nuk mund t'u siguronim edhe vullnetin për të luftuar për atë të ardhme. Nëse Afganistani nuk është në gjendje tu bëjë rezistencë të vërtetë të talebanëve tani, nuk ka asnjë shans që një vit apo pesë vjet më shumë ose 20 vjet më shumë me SHBA-në  në terren do të kishin bërë ndonjë ndryshim.”, tha Joe Biden, presidenti i SHBA-së.

 

 

SHBA e ka bërë të qartë se nuk do të njohë një qeveri të udhëhequr nga talebanët nëse nuk respekton të drejtat e grave dhe vajzave dhe nuk përzë terroristët. Në një intervistë për CNN, një përfaqësues i lartë i talebanëve premton një qeverisje ndryshe.

 

“Prioritetet tona janë ruajtja e sigurisë dhe në ditët në vijim do të krijojmë një qeveri të re,  një qeveri gjithëpërfshirëse Islamike. Ata që do të dorëzojnë armët dhe do t’i bashkohen forcave tona, do të sigurojnë amnistinë, jetët dhe pronat e tyre do të jenë të sigurta. Emrat e tyre do të shënohen në regjistrat tanë, do të jenë një lloj force rezervë, kur të vijë koha, do t’i thërrasim.Vajzat mund të vijojnë arsimimin nga shkolla fillore në të lartë. Diplomatët e huaj mund të vijojnë punën. Ambasadat duhet të funksionojnë. Ne jemi të përkushtuar të garantojmë një ambient të sigurt për ta. Jo vetëm për diplomatët dhe ambasadat, por edhe OJQ-të e huaja.”, tha Sohail Shaheen, zëdhënës i talebanëve.

 

Teksa shumë vende kanë mbyllur përfaqësitë e tyre në Kabul, Rusia, Kina dhe Pakistani nuk kanë ndërrmend të evakuojnë stafin. Ambasadori rus Dimitry Zhirnov tha se do të zhvillojë bisedime me përfaqësuesit e talibanëve për  sigurisë së qytetarëve rusë dhe personelin e Ambasadës. Edhe Kina është e gatëshme  të bashkëpunojë me qeverinë e re. Sa u përket të drejtave të grave, një ndryshim u pa që në ditën e parë të pushtetit taleban, ku të gjitha spikeret femra u “zhdukën” nga ekrani. Të gjitha televizionet kanë ndaluar muzikën dhe emisonet argëtuese, televizioni shtetëror ka shtuar programet fetare. Facebook ndërkohë ka ndaluar nga platformat e tij të gjitha lajmet që kanë të bëjnë me talebanët të cilët i konsideron - organizatë terroriste