Dorëheqjet, Zaev: S’dorëhiqem që Mickovski të vijë në pushtet

 

“Të japë dorëheqje që Mickovski të bëhet kryeministër? Nuk e mendoj këtë. Do të bëhen kryeministër dhe kryetari i Aleancës zëvendëskryeministër kur do ta meritojnë, kur do të kenë empati me popullin, kur do të jenë këtu të ndihmojnë, të japin ide, e jo kështu që ta shfrytëzojnë tragjedinë me dëshirën e shkretë për pushtet.”,- deklaroi kryeministri, Zoran Zaev.

 

 

Kryetari i VMRO–DPMNE–së, Hristijan Mickovski, ishte në Nerasht të Tetovës për të shprehur ngushëllime në një nga familjet e viktimave të zjarrit në spitalin modular. Duke komentuar deklaratën  e kryeministrit, Mickovski kërkoi dhjetëra vite burg për përgjegjësit.

 

“Unë me të vërtetë përpos ndjenjës për të vjellë nuk kam gjë tjetër për të thënë. Përderisa  këta njerëz e udhëheqin shtetin nuk pres hetim transparent. Është mjaft e qartë, objekti nuk ka pasur leje për shfrytëzim. Këtu nevojitet përgjegjësi penale me dhjetëra vite burg.”,- tha kryetari i VMRO–DPMNE–së, Hristijan Mickovski.

 

 

Kryetari i ASh-së, Ziadin Sela, në deklarimin e tij për TV 21, e cilësoi kreun e ekzekutivit si bashkëpërgjegjës pasi nuk ka konfirmuar dorëheqjet e njerëzve të parë në ministrinë e shëndetësisë.

 

“Në qoftë se dikush është përgjegjës s’ka nevojë të vendosë as kryeministri, se atë e vendosë kryeprokuroria. Ky me këtë vetëm bëhet bashkëfajtor, bashkëpërgjegjës dhe në qoftë se ky e paska aq të rëndësishëm Venko Filipçen po le të shkoj bashkë me të.”,- u shpreh kryetari i ASh-së, Ziadin Sela.

 

 

Sela njëkohësisht kërkoi dorëheqje edhe të zëvendëskryeministrit Artan Grubi, nga i cili ka vijuar kundërakuzë.

 

“Pse zotëri Sela apo zotëri Taravari nuk kanë qenë në Tetovë t’i vizitojnë familjet, ta vizitojnë vendin ku ka ndodhur tragjedia e madhe e paparë në hapësirat tona dhe pse nuk bënë asgjë që t’u ndihmojnë atyre familje, por përkundrazi e keqpërdorin tragjedinë për politika të imta parazgjedhore.”,- theksoi zëvendëskryeministri, Artan Grubi.

 

Dorëheqjet e ministrit të shëndetësisë, Venko Filipçe, dhe zëvendësit të tij, Ilir Hasani, janë deponuar në qeveri, por s’kanë marrë konfirmimin e kryeministrit që pret rezultatet forenzike nga hetimet, e më pas dorëheqjet do t’i dorëzohen kuvendit për miratim.