Maqedoni
Escobar: BE të mos shtyjë negociatat me Maqedoninë e Veriut dhe Shqipërinë
20.09.2021 11:53
I dërguari amerikan për Europën Juglindore, Gabriel Escobar, është kritik me Bashkimin Europian....
I dërguari amerikan për Europën Juglindore, Gabriel Escobar, është kritik me Bashkimin Europian pse ai vazhdon ta vonojë perspektivën e integrimit për vendet e Ballkanit Perëndimor.
Sipas Eskobar, nisja e negociatave me Maqedoninë e Veriut dhe Shqipërinë, nuk duhet shtyrë përtej këtij viti.
Zv.ndihmës sekretari për Çështjet e Europës dhe Eurazisë tha se prej dy dekadash shtetet e Ballkanit janë lënë në gjendje amullie nga BE-ja.
“Të kthehesh 20 vite më vonë dhe të shohësh sa pak progres është arritur në këtë drejtim, është disi zhgënjyese. Do donim të shihnim një integrim më të shpejtë”, u shpreh Escobar në një intervistë për agjencinë e lajmeve “Radio Evropa e Lirë”.
Kroacia është vendi i fundit që iu bashkua unionit në vitin 2013 dhe zyrtari amerikan shpreson që me angazhimin e Amerikës, kjo perspektivë t’i hapet së shpejti edhe fqinjëve si Shqipëria, Kosova, Maqedonia e Veriut, Mali i Zi, Bosnjë-Hercegovina dhe Serbia.
Negociatat për anëtarësim në rastin e Shqipërisë janë të lidhura me zgjidhjen e mosmarrëveshjes mes Maqedonisë së Veriut dhe Bullgarisë.
Uashingtoni pret nga Brukseli që ta përshpejtojë integrimin e Ballkanit Perëndimor brenda Bashkimit Europian.
Gabriel Escobar u caktua këtë muaj si i dërguari i Departamentit të Shtetit për rajonin.