Situata në veri të Kosovës, sërish provokime nga pjesa Serbe

 

 

Situata ne veriun e Kosovës këtë të diel ka bërë bashkë kryeministrin Kurti me liderët e opozitës. Në takim morën pjesë kryetari i PDK, Memli Krasniqi dhe kryetari i LDK-së, Lumir Abdixhiku. Nuk ishte i pranishëm,vetëm lideri i AAK-së, Ramush Haradinaj. Në takim është biseduar për situatën dhe zhvillimet në pjesën veriore të Kosovës, me çrast është theksuar përkushtimi i institucioneve të Republikës së Kosovës në shërbim të paqes dhe sigurisë, kushtetutshmërisë dhe ligjshmërisë në vend”. 

 

Krerët opozitarë Krasniqi dhe Abdixhiku, kanë shprehur mbështetjen për sundimin e ligjit në Kosovës dhe për mbrojtjen e kufijve të shtetit të Kosovës. 

 

“Kërkova nga Kryeministri që të marrë masa për zbatimin e ligjshmërisë, garantimin e sigurisë pa dallim. Njëkohësisht, përballë kësaj situate dhe për menaxhimin efikas të saj, kërkova që të ketë koordinim me partnerët ndërkombëtarë, veçanërisht me SHBA-në, BE-në dhe KFOR-in.”, tha Memli Krasniqi, kryetar i PDK-së.

 

“Në takim, shpreha shqetësimet tona për gjendjen e krijuar në Veri. Kryeministrit Kurti i kërkova koordinim të plotë me aleatët tanë; në veçanti me SHBA-të dhe BE-në. Është përgjegjësi e detyrim i tij dhe Qeverisë që koordinimi të bëhet menjëherë.”, tha Lumir Abdixhiku, kryetar i LDK-së.

 

Prej 20 shtatorit, kur hyri në fuqi masa e reciprocitetit për targat nga Serbia, dy rrugë Në Jarinjë dhe Bërnjakë  që lidhin Kosovën dhe Serbinë janë bllokuar nga serbët lokalë të cilët po e kundërshtojnë këtë masë. Në veri të Kosovës është stacionuar  edhe njësiti special I policisë së Kosovës, të cilët po mbajnë  nën kontroll rendin dhe qetësinë. Për situatën e krijuar në veriun e Kosovës, qeveria Kurti akuzon Serbinë, Kurti  kërkon nga faktori nderkombetar të mos i mbyll sytë para nxitjes që bën regjimi autokrat në Serbi ndaj qytetarëve të caktuar të Kosovës. Presidentja Vjosa Osmani ka anuluar qëndrimin në SHBA, ndërsa mbremjen e së shtunës kryeministri Kurti mblodhi Këshillin e Sigurisë Kombëtare.