Zgjedhjet lokale 2021, BDI hap fushatën në Gostivar

 

“Bashkë me Nevzat Bejtën si kandidat, pas 17 Tetorit do të fillojmë rrugëtimin e përbashkët për një qytet të pastër, të sigurtë për banorët dhe fëmijët e tyre, për infrastrukturë publike moderne, sportive, ambiente rekreative dhe arsim cilësor. Është koha të ngrihemi për Gostivarin, të ndalojmë kaosin, ta çlirojmë qytetin nga qentë endacak, ta shëndrrojmë deponinë Rusino në një deponi të sigurtë e të rregulltë dhe të largojmë kazinot nga qendra e qytetit.”, tha Bashkim Hasani, kryetar i Degës së BDI-së në Gostivar.

 

Për manadatin e ardhshëm katërvjeçar Bashkimit Demokratik për Integrim për Gostivarin parasheh më shumë gjelbërim dhe ndërtim të pjesës së pazhvilluar të parkut, shtigje të reja vrapimi dhe çiklizmi, pastrimiin e qytetit dhe rregullimin e deponisë Rusino, ndërtimin i një qendre të posaçme dhe moderne për strehimin dhe trajtimin e qenve endacak si dhe zhvendosjen e kazinove dhe lojërave të fatit nga vendbanimet.

 

“Katër vitet e ardhshme do të jenë vitet e realizimit të shumë projekteve për një infrastrukturë moderne si: tre parkingje nëntokësore, ashtu si dhe ndërtimi i urës së re që do mundësojë lidhje me autostradën rajonale – e ndërtuar bashkë me ekspertët gjatë planifikimit urbanistik. Do të zgjidhim problemin e parkingut e do të sjellim rend në qarkullimin e trafikut.”, tha Hasani.

 

Furnizimi me ujë të pijshëm dhe një sistem modern kanalizimesh për të gjithë qytetarët si në qytet poashtu edhe në fshatra është një premtim tjetër elektoral i BDI-së. Hasani premtoi shkolla të reja e moderne, një stadium të ri multifunksional, parqe të reja dhe zona të gjelbra. Por jo vetëm kaq, me programin e BDI-së për Gostivarin parashihet edhe vendosja e sistemeve të ngrohjes ekologjikе, gazifikim në çdo vendbanim, transporti publik, administratë elektronike dhe shërbime digjitale si dhe programe për të rinjtë.