Cruz Azul kundërshtar i Realit në gjysëmfinalen e Botërorit të Klubeve

Skuadra amerikano-latine kaloi në çerekfinale australianët e Western Sydney Wanderers, me rezultatin 3-1, edhe pse për të caktuar fituesin u desh të luhej koha shtesë.

 

Ndeshja e luajtur në stadiumin "Princi Moulay Abdallah" u zhvillua në kushte të vështira, për shkak të terrenit të rënduar nga rreshjet e mëdha të shiut.

 

Golin e parë e realizoi Iacopo La Rocca për kampionët e Azisë, por kapiteni i Cruz Azul, Gerardo Torrado shndërroi në gol një 11 metërsh, një minutë nga fundi duke e çuar sfidën në kohën shtesë.

 

Australianët pësuan golin e dytë në minutën e 108, përmes Mariano Pavones, ndërsa 10 minuta më vonë Gerardo Torrado shënoi edhe golin e dytë personal, duke siguruar kualifikimin e meksikanëve që tashmë duhet të bëjnë llogaritë me kampionët e Evropës.

 

Sfida mes Cruz Azul dhe Real Madridit, do të luhet ditën e martë në qytetin e Rabatit, ndërsa në gjysmëfinalen tjetër përplasen Auckland City, që dje në çerekfinale mposhti Es Setifin algjerian dhe San Lorenzo, kampioni i Amerikës Latine.

 

Finalja do të zhvillohet në datën 20 dhjetor në Marrakesh.