Maqedoni
Votimi dhe konfirmimi i rezultateve, KShZ hodhi poshtë të gjitha kundërshtimet
21.10.2021 18:19
Komisioni Shtetëror i Zgjedhjeve hodhi poshtë të gjitha kundërshtimet e subjekteve politike për procedurën e votimit...
Komisioni Shtetëror i Zgjedhjeve hodhi poshtë të gjitha kundërshtimet e subjekteve politike për procedurën e votimit dhe procedurën e mbledhjes dhe konfirmimit të rezultateve. Më shumë kundërshtime pati partia e Majta, përkatësisht gjashtë kundërshtime, katër kundërshtime për në Shtip dhe dy për në Kisella Vodë, të cilat KSHZ i hodhi poshtë njëzëri për shkak të mungesës së provave.
Njëzëri u hodhën poshtë edhe kundërshtimet e Partisë Demokratike të Turqve për procedurën e votimit dhe procedurën e mbledhjes dhe konfirmimit të rezultateve në disa vendvotime në Tetovë, Pllasnicë dhe në Lozovë. Debat ngjalli vetëm kundërshtimi i koalicionit ASh-Alternativa për një vendvotim në Dibër, ku sipas parashtruesit të kundërshtimit procesverbali në vendvotimin 543 ishte nënshkruar vetëm nga kryetari i Këshillit Zgjedhor.
“Janë futur numra në procesverbalin 21 për mbledhjen e rezultatit, I cili nuk është valid. D.m.th. ato rezultate edhe sipas detyrës zyrtare duhet t’i shpallim të pavlefshme.”,- tha anëtari i KShZ-së, Krenar Lloga.
“As në procesverbalin 21 nuk kemi asnjë vërejtje që në këtë vendvotim konteston numrat ose votat që janë shënuar në procesverbalin për vendvotimin 543.”,- u shpreh nënkryetarja e KSHZ-së, Ditmire Shehu.
Paraprakisht KSHZ njoftoi se nga 28 kundërshtime të parashtruara nga subjektet politike, 17 ishin tërhequr nga vetë parashtruesit. KShZ nuk shqyrtoi kundërshtimet që ishin dorëzuar pas afatit.
SHPËTIM NUREDINI