Kolumbi, arrestohet trafikanti më i kërkuar i drogës

Mbi 500 ushtarë dhe pjesëtarë të njësive speciale të mbështeturm nga 22 helikopter e kapën në xhungël, “Escobarin” e shekullit 21, trafikantin më i kërkuar të drogës në Kolumbi dhe udhëheqësi i bandës më të madhe kriminale në këtë shtet.

Dairo Antonio Úsuga, i njohur si Otoniel, është kapur të shtunën gjatë një operacioni të përbashkët të ushtrisë, forcave ajrore dhe policisë. Qeveria kolumbiane kishte ofruar 800,000 dollarë shpërblim për informacionet rreth vendndodhjes së tij, ndërkaq Shtetet e Bashkuara kishin ofruar pesë milionë dollarë për kokën e tij.

Presidenti i Kolumbisë, Iván Duque përmes një mesazhi televiziv lavdëroi autoritetet për kapjen e Otonielit. Duke theksuar se kjo është goditja më e madhe kundër trafikimit të drogës në këtë shekull. Kjo goditje mund të krahasohet vetëm me rënien e Pablo Escobarit në vitet e 90-ta, tha presidenti kolumbian.

Otoniel u kap në provincën Antioquia në veriperëndim të Kolumbisë, që gjendet pranë kufirit me Panamanë. Ai kishte përdorur një rrjet të shtëpive të sigurta për të lëvizur dhe për të shmangur arrestimin. Sipas autoriteteve, ai nuk kishte përdorur telefon celular, por kishte përdorur korrierët e tij për të komunikuar.

Një zyrtar policor u vra gjatë këtij operacioni. Sipas shefit të policisë, Jorge Vargas, lëvizjes e tij ishin gjurmuar përmes imazheve satelitore. Agjencitë e Mbretërisë së Bashkuar dhe Shteteve të Bashkuara kishin qenë të përfshira në operacionin për gjetjen e Otonielit.

Otoniel, 50 vjeç, u bë kreu i Klanit të Gjirit, që më herët njihej me emrin Klani Usuga, pasi udhëheqësi i mëparshëm, vëllai i tij, u vra nga policia gjatë një bastisjeje gati dhjetë vjet më parë. Banda e Otonielit kontrollon shumë rrugë që përdoren për trafikimin e drogës nga Kolumbia për në SHBA, por edhe në shtete të tjera, përfshirë edhe Rusinë.

Otoniel tani përballet me një sërë akuzash, përfshirë edhe trafikimin e kokainës në SHBA, vrasjen e zyrtarëve policorë dhe rekrutimin e fëmijëve. Ndaj tij, SHBA ka ngritur akuza që në vitin 2009 dhe ai përballet me mundësinë ekstradimit.

FARIJE DAUTI BAKIU