Procesi i votimit, MPB: Tre incidente, në Kërçovë dhe Tetovë

 

“Në Kërçovë kemi arrestuar një votues pasi ka grisur fletën e votimit pasi ka shfrytëzuar të drejtën e votës. Sipas urdhrave të prokurorit publik, ndaj tij do të ngrihet padi penale. Gjithashtu në Kërçovë është evidentuar edhe fotografim i fletës së votimit, për të cilin gjithashtu do të pasojë padi adekuate. Në Tetovë, një qytetare ka tentuar të shfrytëzojë të drejtën e votës pa paraqitur dokument të identifikimit, por një dokument nga celulari. Edhe ky rast do të zbardhet plotësisht.”,- tha zëdhënësi i MPB-së, Toni Angellovski.

 

 

Edhe asociacioni qytetar Civil procesin e votimit nga nisja e ka cilësuar kryesisht të qetë, por të ndërthurur me gjuhë të urrejtjes nëpër rrjetet sociale. Kryetari, Xhabir Deralla, është shprehur se vetëm disa vëzhgues të CIVIL janë penguar në monitorimin e zgjedhjeve, ndërkaq në Kumanovë, një anëtare e komisionit zgjedhor ka ndikuar tek një votues se për kë të votojë duke e fotografuar të njëjtin me celular.

 

Deralla deklaron edhe për thyerjen e heshtjes së zgjedhore rreth orës 1 të mëngjesit në disa vende në vendbanimin Kapishtec të Shkupit. Në dyert e shumë banesave në blloqet e banimit në të gjithë vendbanimin janë varur fletushka me përmbajtje propagandistike në kontekstin zgjedhor, njoftojnë nga CIVIL.