LSDM: Jo zgjedhje të parakohshme parlamentare

Shumica parlamentare nuk do të votojë për zgjedhje të parakohshme, informon LSDM, duke vlerësuar se paralajmërimet për shumicë të re parlamentare nga lideri i VMRO-DPMN-së, Hristijan Mickoski, janë të parealizueshme. LSDM potencon se shumica aktuale  parlamentare është stabile dhe përgjegjëse ndaj të ardhmes së shtetit dhe popullit.

 

“Partitë e koalicionit qeveritar në listat e këshilltarëve në këto zgjedhje fituan mbi 419.180 vota, 19.090 më shumë se votat e partive të opozitës. Shprehur në mandate të fituara të këshilltarëve, LSDM dhe Koalicioni Qeveritar kanë 664 pozita këshilltarësh, që është 61 më shumë se vendet e këshilltarëve që i ka fituar VMRO-DPMNE dhe opozita. Hristian Mickoski nuk mund të bëjë shumicë parlamentare, pasi ka plane të rrezikshme për shtetin. Në emër të votave të qytetarëve që i ka Koalicioni Qeveritar e që janë më shumë se votat e opozitës, vendi duhet të vazhdojë përpara në emër të nevojës në zgjidhjen e pasojave të pandemisë dhe në përballjen me krizën energjetike, në emër të nevojës që t’i investojmë të gjitha angazhimet për t’i filluar negociatat me BE-në. Kjo shumicë parlamentare nuk do ta vë shtetin në rrezik dhe nuk do të votojë për zgjedhje parlamentare të parakohshme dhe të shpejta.”,- thuhet në kumtesën e LSDM-së pas konferencës për shtyp të Mickoskit, që kërkoi zgjedhje të shpejta të parakohshme.

 

LSDM thotë se shteti është shumë më i rëndësishëm se inati i Mickoskit dhe dëshira e tij për pushtet.