Irak, sulm me dron ndaj kryeministrit Al-Kadhimi

Kryeministri irakian, Mustafa al-Kadhimi, i ka mbijetuar një sulmi me dron në rezidencën e tij.

Rezidenca e Bagdadit në Zonën e Gjelbër është goditur me sulm rakete më 7 nëntor, ka thënë Zyra e kryeministrit përmes një deklarate.

Kadhimi nuk është lënduar nga sulmi, i cili në deklaratë është konsideruar “tentim-vrasje e dështuar” me dron.

Zona e Gjelbër përfshin ndërtesat e Qeverisë irakiane dhe ambasadat.

Qeveria irakiane nuk ka ofruar më shumë hollësi dhe ende askush nuk e ka marrë përgjegjësinë. Kadhimi ka bërë thirrje në Tëitter për “qetësi dhe përmbajtje nga secili, për hir të Irakut”.

Ai më vonë është paraqitur në një transmetim televiziv me pamje të qetë. “Sulmet me dronë dhe raketa nuk ndërtojnë atdheun dhe nuk ndërtojnë të ardhmen”, ka thënë ai.

Shtetet e Bashkuara kanë dënuar sulmin. “Ne jemi qetësuar kur kemi kuptuar se kryeministri nuk është lënduar. Ky akt që duket si terrorizëm, të cilin ne e dënojmë, është drejtuar në zemër të shtetit irakian”, ka thënë zëdhënësi i Departamentit amerikan të Shtetit, Ned Price.

Ky njoftim vjen në kohën e përshkallëzimit të tensioneve të lidhura me refuzimin e milicive të përkrahura nga Irani, që të pranojnë rezultatin e zgjedhjeve parlamentare të muajit të kaluar.

Qindra mbështetës të fraksioneve pro-iranaine në Irak, kanë protestuar afër Zonës së Gjelbër, për shkak të rezultateve të zgjedhjeve parlamentare më 10 tetor.