UÇK, merr përsipër sulmet ndaj stacioneve policore
Ushtria Çlirimtare Kombëtare, merr përsipër përgjegjësinë për sulmet me bomba në stacionet policore në Tetovë dhe Kumanovë, por ajo thotë se ka pasur sulme edhe në Shkup dhe Gostivar.....
“Mbrëmjen e natës 9 dhjetor, në orën 20, në mënyrë të koordinuar njësitet e UÇK-së goditën në afërsi stacionet policore në “Bit Pazar” të Shkup, njësinë speciale “Ilinden”-Shkup, Tetovë, Gostivar dhe Kumanovë”– thuhet në komunikatën e UÇK-së.
Përveç komunikatës, nga posta e njëjtë elektronike ka arritur edhe një deklaratë politike, e nënshkruar nga i ashtuquajturi “Komandant Kushtrimi”.
“Shqiptarët kanë për të thënë edhe për emrin, flamurin dhe për të gjithë shenjat e shtetit fjalën e tyre. Andaj, kujdes me ato në proces. Të lirohen të burgosurit e proceseve të montuara e montuesit e inspiruesit e tyre të dënohen. Ua bëjmë me dije llafazanëve politik, pseudopatriotik të tipit të trimave të internetit e të proklamimeve politike të pashpresa, të mos përdorin e mos t’i shërbejnë me vetëdije a pa të arrogancës shoviniste të pushtetit të Maqedonisë”- thuhet mes tjerash në deklaratën politike të UÇK-së.
Por, nga Ministria e Punëve të Brendshme e kanë vlerësuar deklaratën e UÇK-së si joserioze. “Nuk e kemi në plan të merremi me deklaratat e tilla ose me autorët e tyre. Ndërkohë, ne vazhdojmë hetimet e shpërthimeve në Kumanovë e Tetovë, por edhe ato shpërthime që ndodhën afër qeverisë”- deklaroi zëdhënësi i Policisë, Ivo Kotevski. 