Mbi 350 persona me honorare, Kasami: Të ndërpriten kontratat në vepër

 

“Vendimi im është që të gjitha kontratat të ndërpriten dhe shërbimet po bëjnë analiza nëse ato kontrata janë realizuar dhe nëse pagesat për ato kontrata janë sipas ligjit. Për gjithçka që është paguar në kundërshtim me ligjin, do të kërkoj ato mjete të kthehen në buxhetin e komunës.”,- tha kryetari i komunës së Tetovës, Bilal Kasami.

 

 

Në lidhje me raportin e punës së komunës, Kasami tha se borxhi komunal dyshohet të jetë mbi 20 milion euro, e se janë vërejtur edhe shkelje ligjore të afateve dhe shkelje të procedurave të tenderimit. Theksoi se brenda një kohe të shkurtë do të publikohet revizioni për punën e deritanishme të komunës.  

 

“Shkeljet janë ligjore për shkak se sipas informatave paraprake të cilat i kemi dhe presim që t`i konfirmojmë, bëhet fjalë për shkelje të afateve ligjore të Kodit Zgjedhor, që nënkupton mosnisjen e punimeve brenda afatit ligjor, por ka edhe shkelje të procedurës së tenderimit.”,- theksoi Kasami.

 

Sa i përket parkimit zonal, ai tha se është duke analizuar situatën në ndërmarrjen Parkingu i qytetit dhe nuk përjashtohet opsioni i likuidimit të ndërmarrjes. Paralajmëroi edhe se shtigjet e biçikletave do të largohen. Kasami premtoi se pas konfirmimit të borxhit të komunës, të dhënat do t’i publikojë në ueb-faqen e komunës dhe në vende publike. Njoftoi ndërkohë se komuna nuk ka para për zbukurim të qytetit dhe organizim të festave për Vitin e Ri.