OBSh jep alarmin për Europën: 2 mln viktima deri në mars, duhen masa urgjente

Rastet e infektimeve janë rritur ndjeshëm gjatë ditëve të fundit në Gjermani, Holandë dhe në Austri, ku është rikthyer mbyllja e plotë e vendit. OBSh parashikon se deri në mars të vitit 2022 do të ketë gjithsej dy milionë viktima Covid në Evropë, nëse nuk ndërmerren masa të menjëhershme. 

 

“Numri total i vdekjeve nga koronavirusi ka kaluar shifrën 1.5 milionë në 53 vendet e rajonit. Sot, Covid-19 është shkaku kryesor i vdekjeve në Evropë dhe Azinë Qendrore.”,- shkruan OBSh-ja në një deklaratë.

 

OBSh-ja pret “stres të lartë ose ekstrem” për shtretërit e spitaleve në 25 nga 53 vendet e rajonit dhe në njësitë e kujdesit intensiv në 49 vende të vendosura për t’u përballur me pandeminë.

 

Rritja po nxitej nga varianti Delta shumë i transmetueshëm, i cili tani është mbizotërues në të gjithë rajonin, tha OBSH-ja, por edhe nga relaksimi i gjerë i masave.

 

Po kështu edhe grumbullimi i shumë njerëzve në ambiente të mbyllura për shkak të motit të ftohtë, si edhe një numër i madh ende i pavaksinuar.

 

Efikasiteti i vaksinës kundër formave të rënda të sëmundjes po zbehet dhe “shumë njerëz mbeten të prekshëm ndaj virusit”, tha OBSH-ja.

 

Aktualisht, vetëm 54 për qind e qytetarëve në 53 shtete europiane janë vaksinuar.