Kërçovë, vërshimet e lumit të Zajazit sjellin probleme në lagjen e “Prilepit”

Disa familje të qytetit të Kërçovës që jetojnë përskaj lumit të Zajazit janë rrezikuar nga përmbytjet që u shkaktuan nga reshjet e ditëve të fundit.

 

Vërshimet kanë përmbytur disa objekte banimi në lagjen e “Prilepit” dhe kanë shkaktuar dëme të mëdha materiale në këto ditë të ftohta të dimrit që e vështirësojnë jetën e këtyre familjeve me status të rrezikuar social.

 

Kjo lagje e banuar kryesisht me familje skamnore, me përmbytje të këtilla është ballafaquar edhe në të kaluarën.

 

Banorët vendor kanë kërkuar ndihmën institucionale për zgjidhjen e këtij problemi që do të evitojë vërshimet e lumit të Zajazit, por ata fatkeqësisht vazhdojnë të përballen me rrezikun e përmbytjeve të objekteve të tyre që ndodhen fare pranë lumit, dhe të pa mbrojtura nga uji që del nga shtrati, sa herë që ka reshje të shiut.