Zgjerimi i shumicës parlamentare, Alternativa merr vendimin final

Vendimin përfundimtar do ta merr Këshilli Qendror i Partisë, në mbledhjen që mban në Selinë në Tetovë. Pritet një vendim pozitiv, pasi në kumtesën e përbashkët të takimit të fundit mes kryeministrit Zoran Zaev dhe kreut të Alternativës Afrim Gashi, të datës një dhjetor, u njoftua se është konstatuar progres evident në harmonizimin e qëndrimeve rreth plotësimit të pjesës përmbajtjesore të programit të Qeverisë, kurse janë këmbyer ide dhe vlerësime nga të dyja palët për ndarjen e përgjegjësive në nivelin më të lartë në institucionet e pushtetit qendror.

 

 

Aleanca për Shqiptarët konsideron se Alternativa, si partnere koalicioni në opozitë, po shkel Marrëveshjen për bashkëpunim, sipas së cilës bashkëpunimi duhej të zgjasë deri në zgjedhjet e ardhshme parlamentare. 

 

“Ju urojmë suksese në rrugëtimin Tuaj, për ne të gabueshëm dhe në kundërshtim të plotë me verdiktin të shprehur me votë nga ana e qytetarëve që votuan koalicionin Aleanca për Shqiptarët dhe Alternativa.” – u deklaruan nga ASh. 

 

 

“Alternativa ndodhet para një sfide të madhe.” – thotë kreu i VMRO DPMNE-së, Hristijan Mickovski, i cili vetëm para pak javësh kishte në krah Alternativën për të rrëzuar këtë qeveri. 

 

Konsideron se zgjedhjet e parakohëshme janë të paevitueshme.

 

“Unë kam komentuar se para çfarë sfide po ndodhet kryesia e Alternativës. Të jetë pjesë e qeverisë më kriminale, më të korruptuar dhe më të paaftë në këto 30 vjet ose të mbetet opozitë dhe të kemi zgjedhje të parakohëshme parlamentare. Vendimi është mes këtyre opsioneve, opsion të tretë nuk ka”, u shpreh Mickovski 

 

 

 

“Hristijan Mickovski ka ngec në matricën e regjimit, e cila do që shtetin ta kthejë në izolim, përçarje dhe të papritura; të kacafytur me fqinjët dhe me botën demokratike. Askush nuk pret ndryshe nga ai, i cili s’di dhe s’do të punojë për interesat e qytetarëve.”- thuhet në kumtesën e LSDM-së.