Banorët e Lubotenit penguan policinë të futet në fshat

Policia sot ka marrë në pyetje dy banorë të fshatit Luboten të Shkupit, pasi në mënyrë ilegale kanë transportuar në Tetovë me veturën e tyre duhan të përpunuar, ose thënë ndryshe kaçak.

 

Pas konstatimit policor se duhani i transportuar ka qenë i pakontraktuar, ata kanë bastisur shtëpinë e të dyshuarit dhe kanë konfiskuar vetëm duhanin e grirë.

 

“Një bashkëfshatar i joni ishte i kapur diku në Tetovë me duhan. Edhe pse fshatarët e Lubotenit 90% merren me bujqësi dhe për këtë kanë probleme me duhanblerësit, sepse ata nuk dëshirojnë të blejnë duhanin tonë, sepse gjethi është më i madh dhe për këtë arsye ata s’dëshirojnë ta marrin. Qytetarët janë të detyruar të punojnë duhan, që të sigurojnë kafshatën e bukës për familjet e tyre”- deklaroi kryetari i Bashkësisë Lokale, Naim Saliu.

 

Megjithatë, nga frika e prezencës së madhe policore dhe frika se policia do të bastisë edhe shtëpitë e tjera për të konfiskuar edhe duhanin e tyre, banorët e fshatit Luboten kanë bllokuar hyrjen e fshatit.

 

“Ne e kuptojmë nëse e kanë kapë bashkëfshatarin tonë duke shitur duhan, le ta marrin në pyetje, le t’i japin dënimin e merituar, por nuk ka nevojë të krijohet panik në familjet e fshatit Luboten”- tha Saliu.

 

Banoret e fshatit Luboten fajësojnë qeverinë se nuk ndërmerr masa kundër duhanblerësve, të cilët vite me radhë po anashkalojnë duhanëprodhuesit e Lubetenit dhe nuk e kontraktojnë duhanin e tyre.

 

Ata thonë se preteksti i duhanblerësve se gjethi i duhanit është i madh nuk do të thotë se ky duhan është me kualitet të dobët.