Struga pret fluks të turistëve për festat e fundvitit

 

 

 

“Ajo që marrim si informacion nga sektori i turizmit është se tashmë po bëjnë aranzhime për Vitin e Ri, interesimi më i madh është nga turistët që janë nga rajoni dhe vendet fqinje”, u shpreh përgjegjëseja e agjencionit për turizëm në Strugë, Valentina Pereska.

 

Struga sezonin e kaluar ka shënuar rritje të numrit të turistëve për 45%. Komuna së bashku me Agjencinë për Promovimin e Turizmit do të punojnë në krijimin e përmbajtjeve të reja turistike për të tërhequr sa më shumë turistë.

 

“Ka një rritje të numrit të turistëve për afërsisht 45%, që është afër përqindjes shtetërore të rritjes që është mbi 50% krahasuar me vitin e kaluar. U diskutua edhe për nevojën e komunës së Strugës në përfshirjen e aktiviteteve promovuese, digjitalizimin e sektorit të turizmit, edukimin e kuadrove në turizëm”, theksoi Pereska.

 

Dekorimi i qytetit mbi ura do të nisë këto ditë. Kryetari i komunës thotë se ky vit do të jetë më modest, do të vendosen pemë dhe dekorime të vitit të ri, do të ndriçohet lumi Drini i Zi, por nuk do të ketë luks, sepse do të kursehet për shkak të krizës energjetike.