Maqedoni

Petkov kryeministër i ri i Bullgarisë, në Samitin e BE-së Bullgaria veto ndaj RMV-së

14.12.2021 11:23

Parlamenti bullgar mbrëmë e zgjodhi qeverinë e re me kryeministër, Kirill Petkov....

Parlamenti bullgar mbrëmë e zgjodhi qeverinë e re me kryeministër, Kirill Petkov, i cili do të marrë pjesë në samitin e sotëm të Këshillit për Punë të Përgjithshme të BE-së, ku do të mbështesë fillimin e bisedimeve për Shqipërinë por jo edhe për Maqedoninë e Veriut me BE-në.

Në marrëveshjen e koalicionit sa i përket politikës së jashtme bullgare thuhet se Qeveria e re do ta mbajë qëndrimin ndaj Maqedonisë së Veriut. Në dokument thuhet se marrëdhëniet do të ndërtohen në frymë konstruktive. Hapi i parë është të aktivizohet komisioni bilateral i punës i paraparë me Marrëveshjen për fqinjësi të mirë nëpërmjet kalendarit për takime mujore. Është planifikuar të formohen grupe të punës. Një hap tjetër është rritja e bashkëpunimit në sferën e transportit, përfshi edhe lidhjen ajrore direkte Sofje-Shkup. Ndërtimi i korridorit 8, përkrahje financiare për lidhjen hekurudhore.

Parashihet edhe rritja e bashkëpunimit në sferën e shkencës dhe kulturës. Parashihet komisioni i përbashkët multi-disciplinare i ekspertëve për çështjet historike dhe arsimore. Po ashtu kërkohet njohja e pakicës bullgare në Maqedoninë e Veriut dhe shkëmbimi i dokumenteve arkivore nga viti 1944-1991 me qëllim të rehabilitimit të viktimave të represionit.

Osmani: Bllokada e integrimeve krijon mosbesim në rajon

 
Ky ritëm i paraparë nga qeveria bullgare nuk përputhet me pritshmërinë e vendit për fillimin sa më të shpejtë të bisedimeve me BE-në.
 
Ministri i jashtëm Bujar Osmani të hënën në Londër ka deklaruar se: “Bllokada e integrimeve evropiane për Maqedoninë e Veriut dhe Shqipërinë është e pasaktë, e paarsyeshme dhe kjo krijon mosbesim në gjithë rajonin. Nevojiten hapa të guximshëm politikë nga të gjithë anëtarët e Unionit, para së gjithash nga Republika e Bullgarisë, por edhe nga partnerët tjerë në BE-së; Këtu, natyrisht, llogaris në gatishmërinë tonë për kompromise të sinqerta, me qëllim mbylljen e këtij kapitulli dhe hapjen e perspektivave për Maqedoninë e Veriut dhe për gjithë rajonin”, ka thënë Osmani.