Raporti i Kuvendit: Në vitin 2021 kuvendi ka miratuar 209 ligje

 

“Mund të konkludoj se përpiqeshim që dialogu politik, kryqëzimi i argumenteve dhe beteja për ndryshimin dhe përmirësimin e dispozitave ligjore për lehtësimin e  jetës së qytetarëve tanë të zhvillohet këtu, në suazat e dhomës së demokracisë dhe kjo mund të shihej përmes kanalit televiziv të Kuvendit dhe me ndjekjen e seancave përmes strimingut. Nuk them se kjo ishte maksimalja që mund të bënim përkundrazi gjithmonë mundet më shumë.”,- tha  kryetari i Kuvendit, Talat Xhaferi.

 

 

Xhaferi ripërsëriti qëndrimin se nuk do t’i përgjigjet pozitivisht kërkesës së grupit parlamentar të VMRO DPMNE-së që të enjten e fundit të dhjetorit të thërrasë seancë të re për pyetje deputetësh, pasi Kuvendi ka konstatuar dorëheqjen e Qeverisë. Pret që mandatari i ri t’ia dorëzojë Kuvendit Programin dhe përbërjen e Qeverisë së re më 11 janar.

 

“Përafërsisht, atë që unë ndjek kalendaret, pritshmëritë janë që më 15-16 janar, edhe pse është e shtunë dhe e diel, kjo nuk është pengesë për konvokim të seancave, eventualisht më 16 janar të votohet për qeverinë e re dhe nga 17 janari dita e hënë të jenë në detyrë ministrat e rinj, përbërja e re qeveritare.”,- theksoi Xhaferi.

 

Sipas Raportit vjetor për punën e Kuvendit rezulton se është Qeveria ajo e cila propozon pjesën dërmuese të projekt/ligjeve në Kuvend. Nga gjithsej 209 ligje të miratuara, 188 i ka parashtruar Qeveria ndërkaq, vetëm 21 projekt-ligje janë parashtruar nga deputetë.