SHBA, mbi një milion të infektuar brenda 24 orëve

Shtetet e Bashkuara kanë shënuar rekord prej më shumë se 1 milion rastesh me Covid-19 brenda 24 orësh. Pavarësisht kësaj shifre zyrtarët kanë paralajmëruar se kulmi i përhapjes së variantit Omicron ende nuk është arritur.

Një shifër rekorde prej një milion e 80 mijë e 211 rastesh u raportua për ditën e hënën – numri më i lartë ditor i rasteve në botë. Shumica e rasteve në ShBA janë me variantin Omicron.

Këshilltari i lartë amerikan për pandemi, Anthony Fauci, ka thënë se vendi është duke u përballur me ngritje pothuajse vertikale të numrit të rasteve dhe se kulmi i tyre mund të vijë tek pas disa javëve.

Megjithatë, ai tha se shembulli i Afrikës Jugore – ku varianti Omicron u përhap shpejt para se të pakësohej – ofron ca shpresë.

Shkalla e vdekjeve dhe e pacientëve në spitale në Shtetet e Bashkuara ka qenë shumë më e ulët në javët e fundit se në rastet e kaluara, kur ka pasur rritje të numrit të rasteve.

Rekordi i mëparshëm i rasteve për 24 orë në Shtetet e Bashkuara ishte rreth 590.000, i raportuar vetëm para katër ditësh. Sipas të dhënave të Universitetit “Johns Hopkins”, javën e kaluar nga Covid-19 në Shtetet e Bashkuara kanë vdekur mbi 8.600 persona.