Arrestime të reja në rastin “Brezovica”

 

Bastisje po zhvillohen në Ministrinë e Mjedisit dhe Planifikimit Hapësinor si dhe nëntë lokacione të tjera në Prishtinë, Ferizaj dhe Shtërpcë. Në mesin e të arrestuarve janë dy zyrtarë të Ministrisë dhe pesë qytetarë. Zyrtarët dyshohen për marrje ryshfeti derisa qytetarët për dhënie ryshfeti.

 

Në fund të dhjetorit të vitit 2021, Policia e Kosovës ka arrestuar dhjetë persona, përfshirë ish-kryetarin e Komunës së Shtërpcës, njëherësh zyrtarin e Listës Serbe, Bratisllav Nikolliq, nën akuzat për keqpërdorim të pozitës zyrtare.

 

Autoritetet dyshojnë se Nikolliq ka përfituar deri në një milion euro për lejet e lëshuara kundërligjshëm për ndërtimin e objekteve në Brezovicë, në Komunën e Shtërpcës.

 

Nikolliq dhe të arrestuarit e tjerë dyshohet se kanë marrë vila, vetura dhe dhurata të tjera në këmbim të lëshimit të lejeve për ndërtimin e vilave dhe objekteve të tjera në Parkun Kombëtar “Sharri”, ku gjendet edhe Brezovica,  e njohur për qendrën e skijimit.

 

Nëse vërtetohet se shumica e ndërtesave në Brezovicë janë ndërtuar në mënyrë të kundërligjshme, të gjitha pronat, përfshirë edhe vilat, do të sekuestrohen përkohësisht.