Osmani, RMV mbështet integritetin e Ukrainës

Ministri i Punëve të Jashtme, Bujar Osmani, ka marrë pjesë në mbledhjen e jashtëzakonshme të Këshillit të Atlantikut të Veriut të NATO-s në nivel të Ministrave të Jashtëm, e cila u mbajt përmes video-konferencës.

Takimi u fokusua në grupimin ushtarak rus rreth kufirit me Ukrainën, si dhe çështje të tjera që lidhen me sigurinë evropiane. Takimi i jashtëzakonshëm u mbajt në prag të Këshillit të dakorduar më parë, NATO-Rusi, dhe takime të tjera në formate të ndryshme, me qëllim për të mos lejuar përshkallëzimin e krizës dhe për të gjetur një zgjidhje me mjete komunikimi joushtarake, fillimisht diplomatike.

Ministri Osmani ritheksoi mbështetjen e Maqedonisë së Veriut për sovranitetin dhe integritetin territorial të Ukrainës dhe shprehu shpresën për zgjidhje paqësore të situatës në dhe rreth këtij vendi.

Ai nënvizoi rëndësinë e unitetit dhe kohezionit mes aleatëve, si një mjet i fortë për ruajtjen e paqes dhe stabilitetit, por edhe për bashkëpunimin e ngushtë me BE-në dhe vendet e tjera partnere, thuhet në njoftimin e MPJ-së.

Edhe Ministrja për Evropën dhe Punët e Jashtme e Shqipërisë, Olta Xhaçka, mori pjesë në takimin e jashtëzakonshëm online të Këshillit të Atlantikut të Veriut, 

“Shqipëria mbështet dialogun me Rusinë duke qëndruar të patundur në parimet dhe angazhimet e saj”, tha Ministrja Xhaçka.