Luhrmann nuk e thotë prerë a duhet ndarë Shqipëria dhe RMV

Ministrja gjermane për Europën, Anna Luhrmann, gjatë vizitës në Tiranë, nuk ka dhënë përgjigje të prerë nëse Shqipëria duhet të ndahet nga Maqedonia e Veriut, sa i përket fillimit të bisedimeve me BE-në.

Ajo ka thënë se ka marrë sinjale pozitive nga Bullgaria se do të ndihmojë në çuarjen përpara të integrimeve.

“Që prej marrjes së detyrës së re në bisedat e mia në Bruksel, e kam diskutuar këtë çështje që të ecim përpara në nisjen e bisedimeve me Maqedoninë e Veriut dhe Shqipërisë. Muajin e ardhshëm ne do të diskutojmë në forumet në Bruksel dhe në të ardhmen e afërme do bëjmë përpara në këtë drejtim. Për ne ka rëndësi që të ecim sa më shpejt në këtë rrugë në nisjen e negociatave për Shqipërinë dhe Maqedoninë e Veriut, kemi marrë sinjale pozitive dhe nga Bullgaria që të gjejmë në një moment sa më të afërm për një zgjidhje sa më të përshtatshme.”,- tha ministrja gjermane për Europën, Anna Luhrmann.

Ministrja gjermane udhëtoi drejt Tiranës menjëherë pas vizitës në Shkup, ndërsa në kryeqendrën shqiptare ajo u prit nga zëvendëskryeministri, Arben Ahmetaj. Shqipëria i ka bërë detyrat e shtëpisë për hapjen e negociatave për anëtarësimin në Bashkimin Evropian, theksoi Ahmetaj.

Sa i përket nismës “Open Balkan”, ministrja gjermane Luhrmann deklaron se i mbështet nismat rajonale të cilat ashtu si edhe Procesi i Berlinit kërkojnë zhvillimin e Ballkanit Perëndimor, por ajo theksoi nevojën për gjithëpërfshirje në këtë iniciativë, të cilës tani për tani nuk i janë bashkangjitur Kosova, Bosnja dhe Hercegovina, si dhe Mali i Zi. (Rexhep Qamili, TVM2)