Indeksi i korrupsionit, akuza mes VMRO-DPMNE-së dhe LSDM-së

 

“Për këtë situatë në të cilën ndodhet Maqedonia, për regjimin hibrid që shkatërroi drejtësinë duke instaluar korrupsion në çdo sferë të shoqërisë, përgjegjësia bie mbi LSDM-në. Kjo qeveri e LSDM-së ka vite që e zhvillon krimin, në vend që ta luftojë atë. Në këtë raport përputhen faktet se Maqedonia është shtet i robëruar. Të përkujtohemi në pasaportat e krimineleve, MPB nuk ka ndërmarrë asnjë aksion për zbardhjen e krimeve, sistemi funksionon mbi principin ryshfet dhe korrupsion, drejtësia është selektive dhe jo e njëjtë për të gjithë qytetarët.”,- tha zëdhënësja e VMRO-DPMNE-së, Marija Miteva.

 

I menjëhershëm ka qenë reagimi i LSDM-së. Sipas saj, përparimi prej 24 vende në indeksin e korrupsionit e demanton VMRO-në e cila është simbol i krimit dhe korrupsionit.

 

“Raporti vë në dukje progres në luftën kundër korrupsionit, vlerësim pozitiv në  miratimin e agjendës dhe planit aksional në luftën kundër korrupsionit, reformën zgjedhore dhe gjyqësore, si dhe trajtimin e nepotizmit. Është e qartë se VMRO-DPMNE ka problem me raportin, sepse progresi, ndër të tjera, i detyrohet sundimit joselektiv të ligjit, rasteve të iniciuara dhe aktgjykimeve ndaj zyrtarëve të pushtetit të kaluar dhe atij aktual, gjë që është e papranueshme për partinë opozitare.”,- thuhet mes tjerash në kumtesën e LSDM-së.

 

Në raportin e fundit Maqedonia e Veriut rangohet në vendin e 87, në një grup me Kolumbinë, Etiopinë, Marokon, Tanzaninë dhe Vietnamin, e nga vendet e rajonit radhitet bashkë me Kosovën.