Mustafa bën thirrje të mos lëshohet Kosova

“Premtoj se do të punoj me përkushtim që qeveria të hapë perspektivë për zhvillim ekonomik dhe punësim në vendin tonë, në qytetet e në fshatrat tona, sepse ardhmërinë tonë duhet të ndërtojmë këtu”.

Mustafa thotë se Kosova është më e sigurt sesa kampet e azilantëve në Hungari, Francë, Austri, Gjermani e gjetiu.

“Shtëpitë tona këtu janë më të mira e më të dinjitetshme sesa tendat dhe dyshekët në halla sportive e në fusha. Ju i keni fituar me mund e djersë paratë dhe pasurinë, për t’ua dhënë matrapazëve dhe ndërmjetësuesve shqiptarë e serb, të cilët me dëshirë do ta boshatisnin Kosovën për interesa të tyre, ashtu siç serbet i bënë bosh shumë pjesë shqiptare gjatë historisë sonë”- shkruan ai.

Kryeministri i Kosovës pranon se ka mjaftë probleme për t’u zgjidhur, por thotë se ato nuk do t’i zgjidhin duke ikur nga to dhe duke e marrë botën në sy, por duke u ballafaquar me to. “Programi ynë qeverisës dhe përkrahja që e kemi nga komuniteti ndërkombëtar krijon mundësi për hapje të vendeve të punës për të rinjtë, për shkollim më të mirë e perspektivë të gjeneratave të reja. Jam i bindur se së shpejti mund të kemi liberalizimin e vizave dhe njerëzit tanë do të dalin e do të shohin botën, të lirë si të tjerët, pa shitë shtëpi, tokë e bagëti dhe do të kthehen të punojnë në vendin e tyre dhe në pronat e tyre”- thotë Isa Mustafa.