Biden: Amerikanët të largohen nga Ukraina, situata mund të del nga kontrolli

Kreu i Shtëpisë së Bardhë tha se nuk do të dërgonte trupa për të shpëtuar amerikanët, nëse Moska pushton Ukrainën. Ai paralajmëroi se gjërat në rajon mund të çmendeshin shumë shpejt.

 

Kryeministri britanik Boris Johnson paralajmëroi të enjten se Europa përballej me kërcënimin më të madh të sigurisë në dekada, ndërsa theksoi se lufta do të kishte pasoja katastrofike. Johnson, i cili u takua me Sekretarin e Përgjithshëm të NATO-s, Jens Stoltenberg, e më pas me presidentin polak Andrej Duda, tha se nuk besonte që Rusia e kishte marre vendimin për të pushtuar Ukrainën, por të dhënat e inteligjencës mbeteshin të zymta.

 

Teksa ofensiva diplomatike për gjetjen e një zgjidhje politike ndaj krizës vijon ethshëm, Rusia dhe Ukraina njoftuan të enjten se nuk ishin dakordësuar për ndonjë rrugëdalje të mundshme për t’i dhënë fund konfliktit në lindje të Ukrainës, në bisedimet me zyrtarët francezë dhe gjermanë. Sinjale dekurajuese erdhën edhe pas takimit të shefit të diplomacisë ruse, Sergei Lavrov me ministren e Jashtme britanike liz truss. Lavrov i cilësoi bisedimet si zhgënjyese dhe tha se marrëdhëniet mes Rusisë dhe Britanisë ishin në pikën më të ulët në shumë vite.