Qindra pasagjerë të bllokuar në anijen e djegur
Qindra pasagjerë kanë mbetur të bllokuar në një traget të djegur në afërsi të ishullit grek Korfuz...
Kushtet e vështira klimatike janë duke i penguar përpjekjet e shpëtimit. Autoritetet në Greqi dhe Itali e kanë urdhëruar tragetin që të evakuohet mëngjesin e ditës së sotme, për shkak të shpërthimit të zjarrit.
Deri më tani vetëm 150 nga 478 pasagjerët janë larguar nga anija e djegur, e cila po udhëtonte nga porti grek Patras për në Ankona të Italisë. Bëhet me dije se shtatë anije tregtare si dhe anije të zjarrfikësve italianë e grekë, e kanë rrethuar anijen e djegur.
Era që po fryen rreth 100 kilometra në orë, po e vështirëson shpëtimin e pasagjerëve.Televizioni grek ka raportuar se pasagjerët e shpëtuar janë lagur nga uji i ftohtë dhe kanë kollitje si rezultat i tymit të shkaktuar.