Shaqiri: Maska vazhdon të jetë e obligueshme në shkolla

Derisa Komisioni për Sëmundje Infektive të vendos ndryshe, mbetet obligimi që nxënësit dhe arsimtarët të mbajnë maska, thotë ministri i arsimit, Jeton Shaqiri. Ai theksoi se Ministria e Arsimit nuk ka kompetenca për sjelljen e rekomandimeve lidhur me pandeminë. 

 

“Kur Komisioni për Sëmundje Infektive do të vlerësojë se nuk janë të nevojshme në procesin arsimor, jam i sigurt se ata do të japin rekomandim për heqjen e maskave. E di se jemi në një periudhë kur të gjithë presim lehtësime në pjesën e rekomandimeve, por nga përvoja e dimë se nëse kemi masa lehtësuese, mund të kemi edhe numër më të lartë të infektimeve.”,- deklaroi Jeton Shaqiri nga MASH.

 

Ai këto komente i bëri pas takimit me pushtetin lokal, sektorin e biznesit dhe shkollat e mesme profesionale në Strumicë dhe Vallandovë. 

 

Dialogu i këtillë i Ministrisë së Arsimit është pjesë e fushatës “Mëso zgjuar, puno profesionalisht”, me qëllim të krijimit të politikave arsimore për avancimin e arsimit profesional, që do të siguronin kuadrot deficitare në tregun e punës.