Vaksinimi, ulet interesimi i qytetarëve për t’u vaksinuar

Në krahasim me muajt e kaluar, aktualisht është ulur interesimi i personave për t’u vaksinuar, thonë nga Poliklinika e Çairit. Në këtë pikë vaksinimi brenda një jave janë vaksinuar 275 persona. 

Me heqjen e disa masave për Kovid-19, është ulur dukshëm numri i personave për t’u vaksinuar. Nga Poliklinika e Çairit thonë se shumë pak qytetarë vijnë për t’u vaksinuar edhe atë vetëm me dozën e tretë.

 

Interesimi më tepër vjen nga sistemi “Termini im”, mirëpo jo aq sa janë të regjistruar në termin.

 

“Gjatë këtij muaji interesimi i qytetarëve për t’u vaksinuar ishte i ulët, edhe pse kemi termine të regjistruara nga MSH nga sistemi “Termini im”. Nëpërmjet këtij sistemi janë të regjistruara rreth 500-600 termine në ditë dhe prej tyre arrijnë të vijnë deri në 50 maksimum. Interesimi më i madh është për vaksinën  e tretë, ndërsa për të parën dhe të dytën nuk ka shumë interesim, është ulur jashtëzakonisht interesimi nga heqja e disa masave nga Komisioni për Sëmundje Infektive.”,- deklaroi Vlora Azizi nga Poliklinika e Çairit.

 

Qytetarët që i hasëm në poliklinikë nuk shprehen të interesuar për të marrë dozën e tretë të vaksinës.

 

“Jo jo nuk jam vaksinuar…nuk e shoh të arsyeshme kur jam shumë mirë për çka ta marr.”,- tha një qytetar.

 

“I kam marrë të tria, mirë njehërë po ndihem.”,- theksoi një qytetar. 

 

“Vetëm dy doza, të tretën po thonë mos me marrë.”,- u shpreh një qytetar. 

 

“Dy i kam marrë, të tretën jo.”,- potencoi një qytetar. 

 

Në raportin javor të Institutit të Shëndetit Publik javën e kaluar janë regjistruar gjithsej 1.818 raste të reja pozitive nga 30 qytete të vendit, që përbën ulje prej 27.4 për qind, në raport me një javë më parë. Numri, megjithatë, i testeve të kryera për Kovid-19 në periudhën 7-13 mars është ulur për 12 për qind. Gjatë javës së kaluar janë raportuar gjithsej 267 riinfeksione, që paraqet rënie prej 28.2 për qind krahasuar me një javë më parë.