Thaçi: Do të përkeqësohet situata në Maqedoni

Sipas tij, përkeqësimi do të jetë në planin ekonomik, në marrëdhëniet ndëretnike, por do të ketë edhe thellim të bllokadës në procesin eurointegrues. Përkeqësimin e mëtejshëm të raporteve ndëretnike, Thaçi e sheh në aspektin e të drejtave politike dhe njerëzore të shqiptarëve. Në fjalimin e fundvitit, të mbajtur për herë të parë në Shkup, Thaçi u uroi shqiptarëve veç shëndet.

“Shumë shëndet shqiptarëve! Të dytën nuk mund ta them se do të kenë sukses. Dua të flas me korrektësi dhe me seriozitet. Vitin e ardhshëm pres përkeqësim të situatës në Maqedoni, sidomos për shqiptarët. Thellim të mëtejshëm të krizës ekonomike për shqiptarët, për shkak se qeveritarët shqiptarë nuk mbërrijnë të mbrojnë veten, e lëre më të mbrojnë ekonominë e shqiptarëve apo të bëjnë investime për shqiptarët”- deklaroi kryetari i PDSh-së, Mendu Thaçi.

Zgjidhjen e kësaj situate të pashpresë, Thaçi e sheh tek Bashkësia Ndërkombëtare, tek e cila gjithashtu sheh mungesë interesi për të ndërhyrë.

“Normalisht, në të gjithë këtë situatë të pashpresë ekziston një shpresë e vogël se situata mund të përmirësohet dhe kjo shpresë e vogël e ka emrin Bashkësia Ndërkombëtare, ShBA dhe UE. Edhe pse nuk vërej asnjë shenjë se ata do të ndërhyjnë në Maqedoni për ta përmirësuar situatën”- u shpreh Thaçi.

Sa u takon zhvillimeve brendapartiake, sipas Thaçit, viti 2014 ka qenë viti më i vështirë për PDSh-në. Ndërkaq, sa i përket fraksionimit të partive shqiptare dhe paraqitjes së subjekteve të reja, Thaçi tha se ka qëndrim të ndryshëm nga lideri i BDI-së. (Shpëtim Nuredini, TVM2)