Kryqi i Kuq: qytetarët janë humanë në dhurimin e gjakut

Të dhurosh gjak mund të bëhesh shkak që dikujt t’ia rikthesh buzëqeshjen, të dhurosh gjak mund të bëhesh shkaktar që dikujt t’i shpëtosh jetën. Kjo u tha gjatë manifestimit të Kryqit të Kuq me rastin e  Ditës për Dhurimin e Gjakut.

 

Sait Saiti - kryetar i Kryqit të Kuq tha se qytetarët në Maqedoninë e Veriut kanë dëshmuar humanitetin e tyre kur është në pyetje dhurimi i gjakut. 

 

“Meqenëse jemi një ndër shtetet në rajon që dhurimin e gjakut e bëjnë në baza krejtësisht vullnetare dhe arrijnë që krejtësisht t’i plotëson nevojat e sistemit shëndetësor mund të konstatojmë se qytetarët tonë e ndjejnë momentin e duhur se kur duhet të aktivizohen në këtë drejtim. Duhet punë pasi e dini që dhuruesit e gjakut janë kategori njerëzish të cilët lindin rriten plaken dhe kështu mbaron mundësia për të dhuruar më tej. Nga kjo imponohet nevoja për të punuar me brezat e rinj.”,- tha kryetari i Kryqit të Kuq, Sait Saiti.

 

Sali: Ministria hartoi program për dhurimin e gjakut

 

Në manifestim mori pjesë edhe ministri i shëndetësisë, Bekim Sali, i cili tha se këto momente janë të rëndësishme për t’i përkujtuar njerëzit se sa i rëndësishëm është dhurimi i gjakut.  

 

“Me qëllim të shtimit të dhurimit të gjakut, Ministria e Shëndetësisë në nivel vjetor hartoi program për organizimin dhe përparimin e dhurimit të gjakut në vend. Për këtë vit, buxheti i programit arrin në 45 milion denarë.”,- u shpreh ministri i shëndetësisë, Bekim Sali.

 

Kryq i Kuq, në kuadër të strategjisë për promovimin e aktiviteteve humane siç është dhurimi i gjakut, ndau edhe mirënjohje për qytetarët që dhuruan gjak.