Përshkallëzohen tensionet në Hormuz, përplasje mes ShBA-së dhe Iranit për kontroll

Tensionet në Lindjen e Mesme për kontrollin mbi Ngushticën e Hormuzit përsëri janë përshkallëzuar. Presidenti i Donald Trampit deklaroi se ShBA-ja ka goditur shtatë mjete të shpejta iraniane në këtë rrugë ujore, ndërsa përmes operacionit “Projekti Liria”, pretendon se përpiqen të çlirojnë rreth dy mijë anije të bllokuara jashtë Gjirit. Kreu i Shtëpisë së Bardhë e quajti përplasjen me Iranin një “mini-luftë” që, sipas tij, po zhvillohet shumë mirë.

“Nuk mund të lejojmë që Irani të ketë armë bërthamore. Kemi arritur nivele të reja. Bëmë një devijim të vogël dhe po funksionon shumë mirë. Ata nuk kanë marinë, forcë ajrore, nuk kanë mbrojtje kundërajrore. Nuk kanë radar. Nuk kanë asgjë. Në fakt, nuk kanë as liderë. Liderët, rastësisht, mungojnë...”, - deklaroi presidenti i ShBA-së, Donald Tramp.

Irani këmbëngul se e kontrollon ngushticën dhe kërkoi që të gjitha anijet që duan të kalojnë të marrin leje nga forcat e armatosura. Megjithatë, ShBA-ja njoftoi se dy anije tregtare nën flamurin amerikan kanë kaluar me sukses këtë rrugë detare. Koreja e Jugut dhe Emiratet e Bashkuara Arabe raportuan dëme në anije komerciale, ndërsa një sulm i dyshuar iranian shkaktoi zjarr në një depo nafte në Fujairah, për të cilin Teherani mohoi përfshirjen.

“Në këtë zonë, çdo anije që dëshiron të kalojë duhet ta bëjë këtë me leje nga forcat e armatosura të Republikës Islamike për të qenë e sigurt. Çdo anije që i përket armikut dhe përpiqet të kalojë do të përballet me masa vendimtare.”, - theksoi zëvendësshefi i Gardës Revolucionare Iraniane, Jadollah Javani.

Ministria e Jashtme e Iranit deklaroi se zhvillimet e fundit në këtë rrugë strategjike ujore konfirmojnë se nuk ka zgjidhje ushtarake për krizën politike.

Sulmet e reja kanë rritur sërish çmimet e naftës në tregjet botërore, ndërsa Fondi Monetar Ndërkombëtar paralajmëron se inflacioni tashmë është në rritje dhe ekonomia globale mund të përballet me pasoja edhe më të rënda, nëse konflikti vazhdon deri në vitin 2027. (Farije Dauti Bakiu, TVM2)