Dita e fitores në hijen e luftës, armëpushim i shkurtër mes Rusisë dhe Ukrainës

 

“Bëma e madhe e brezit fitimtar frymëzon ushtarët që po kryejnë operacione ushtarake speciale sot. Ata po përballen me një forcë agresive të armatosur dhe të mbështetur nga i gjithë blloku i NATO-s. E megjithatë, heronjtë tanë marshojnë përpara. Ne ndajmë një qëllim të përbashkët. Secili prej nesh jep një kontribut personal për Fitoren. Unë besoj fuqimisht se kauza jonë është e drejtë! Ne jemi së bashku! Fitorja ka qenë gjithmonë dhe gjithmonë do të jetë e jona!”, - u shpreh presidenti i Rusisë, Vladimir Putin.

 

Më parë, Kievi dhe Moska konfirmuan se kishin rënë dakord për një armëpushim tre-ditor dhe shkëmbim të të burgosurve të luftës, pasi Presidenti i SHBA-së Trump njoftoi se kishte arritur të ndërmjetësonte një marrëveshje midis dy palëve ndërluftuese për një armëpushim nga 9 deri më 11 maj.

 

“Presidenti Putin u pajtua. Presidenti Zelensky u pajtua. Kemi një periudhë të shkurtër kohore kur ata nuk do të vrasin njerëz, dhe kjo është shumë mirë. Dhe ata gjithashtu ranë dakord të kthejnë 1,000 të burgosur nga secila palë. Pra, pothuajse menjëherë ata do të transferojnë 1,000 të burgosur nga secila palë. Kjo është shumë mirë.”, - u shpreh presidenti i SHBA-së, Donald Trump.

 

Presidenti ukrainas Zelensky kërkoi garanci se Rusia do të respektonte marrëveshjen, dhe në të njëjtën kohë lëshoi një dekret që i lejonte Rusisë të mbante një paradë ushtarake. Kremlini u përgjigj se nuk kishin nevojë për lejen e askujt. Udhëheqësi ukrainas theksoi se sot ata po festojnë Ditën e Evropës plotësisht të vetëdijshëm se tashmë janë një pjesë e pandashme e familjes evropiane.

 

“Ne po mbrojmë Ukrainën, pavarësinë tonë, të ardhmen tonë dhe duke vepruar kështu, ne në Ukrainë po mbrojmë Evropën tonë. Evropën, pjesë e së cilës ishte dhe do të mbetet Ukraina. Që nga ditët e para të luftës së përgjithshme deri në ditët e sotme, Evropa ka qëndruar pranë Ukrainës. Dhe kjo nuk është mëshirë, është një zgjedhje e bërë nga evropianët, të qëndrojnë në të njëjtën anë me të guximshmit dhe të fortët, ukrainasit që luftojnë sot për paqe dhe mbrojtje të vërtetë nga tirania, jo vetëm për veten e tyre, por për të gjithë kontinentin.”, - u shpreh presidenti i Ukrainës, Volodymyr Zelensky.

 

Më 28 shkurt 2022, menjëherë pasi u sulmua nga Rusia, Ukraina aplikoi për anëtarësim në Bashkimin Evropian. Sipas Komisionit Evropian, negociatat për pranimin e Ukrainës në bllok duhet të fillojnë pa vonesë.