MASh, udhëzues elektronik për drejtimet profesionale

 

“Platforma i promovon të gjitha drejtimet profesionale të cilat ekzistojnë në shkollat e mesme profesionale në vend. Ka rol informativ dhe këshilldhënës dhe do t’u ndihmojë nxënësve dhe prindërve që të informohen më mirë për drejtimet e arsimit, perspektivën për arsim të mëtejshëm, si dhe mundësitë për punësim dhe zhvillim të karrierës së nxënësve.”, - deklaroi ministrja e Arsimit dhe Shkencës, Vesna Janeska.

 

“Nxënësit do të mund t’i identifikojnë më mirë interesat dhe potencialin e tyre, ndërsa prindërit do të kenë një burim të sigurt informacioni. Platforma mundëson edhe prezantimin e kompanive të përfshira në arsimin dual, duke iu dhënë mundësi nxënësve dhe prindërve të informohen më lehtë për mundësitë e të mësuarit përmes punës dhe bashkëpunimit me punëdhënësit.”, - theksoi  drejtori i Qendrës për Arsim Profesional, Besnik Zendeli. 

 

Qëllimi i platformës është të plotësojë mungesën e informacionit mbi edukimin profesional, duke bashkuar institucionet publike, shkollat dhe sektorin privat.

 

“Platforma është e rëndësishme për përmirësimin e komunikimit mes institucioneve publike, nxënësve dhe prindërve të tyre. Ajo paraqet një ndryshim nga komunikimi i njëanshëm në një komunikim më të qasshëm dhe të fokusuar drejt nxënësve.”, - u shpreh zëvendësambasadorja e Zvicrës, Mihail Harari.

 

Udhëzuesi është i qasshëm në adresën elektronike Kualifikaci.crs.gov.mk dhe i promovon të gjitha drejtimet dhe profilet e arsimit që ekzistojnë në shkollat e mesme profesionale në tërë vendin, sipas rajoneve, kualifikimeve, sektorëve dhe shkollave.