Takimi Tramp - Xi Jiping, Ngushtica e Hormuzit në fokus të bisedimeve

 

“Kemi pasur një marrëdhënie fantastike. Jemi kuptuar shumë mirë. Kur kishte vështirësi, i zgjidhnim shumë shpejt. Dhe do të kemi një të ardhme fantastike së bashku. Kam respekt të madh për Kinën dhe për gjithçka që keni arritur. Ju jeni një lider i shkëlqyer.”, - deklaroi presidenti i ShBA-së, Donald Tramp.

 

Xi Jinping deklaroi se ShBA-ja dhe Kina duhet të bashkëpunojnë dhe jo të përballen me njëra-tjetrën, duke theksuar rëndësinë e stabilitetit global. Ai paralajmëroi se çështja e Tajvanit mbetet shumë e ndjeshme, ndërsa shtoi se në luftën tregtare nuk ka fitues.

 

“Bota po kalon ndryshime të përshpejtuara të papara dhe ka arritur në një udhëkryq të ri. A mund të punojnë Kina dhe ShBA-ja së bashku për t’u përballur me sfidat globale, duke sjellë stabilitet në botë dhe një të ardhme më të mirë për njerëzimin.”, - theksoi presidenti i Kinës, Xi Jinping.

 

Situata në Lindjen e Mesme dhe pasojat e krizës energjetike dominuan një pjesë të bisedimeve mes dy liderëve. Trampi dhe Xi ranë dakord se Ngushtica e Hormuzit duhet të mbetet e hapur, ndërsa Uashingtoni kërkon nga Pekini një rol më aktiv për qetësimin e tensioneve në rajon. 

 

“Është në interesin e tyre ta zgjidhin këtë. Shpresojmë që të luajnë një rol më aktiv për ta bindur Iranin të heqë dorë nga ajo që po bën aktualisht në Gjirin Persik.”, - u shpreh sekretari i shtetit i ShBA-së, Marko Rubio.

 

Nga ana tjetër, Irani e akuzoi ShBA-në për tensionet rreth Ngushticës së Hormuzit dhe vlerësoi se bllokada amerikane rrezikon stabilitetin global energjetik. Nga takimi i BRIKS-it në Nju Delhi u bë gjithashtu thirrje kundër përdorimit të forcës ushtarake ndaj vendeve anëtare të organizatës.

 

“Ngushtica e Hormuzit vuan më së shumti nga agresioni amerikan dhe bllokada që ata kanë vendosur. Ngushtica është e hapur për anijet tregtare dhe ne nuk kemi krijuar asnjë pengesë.”, - deklaroi ministri i Punëve të Jashtme i Iranit, Abas Aragçi.

 

“Një nga vendet fqinje, anëtare e BRIKS-it, për fat të keq nuk tregoi rezultat të mirë gjatë agresionit ushtarak kundër Iranit dhe ua vuri territorin e saj në dispozicion agresorëve, Amerikës dhe Izraelit. Presim që kjo çështje të përfshihet në deklaratën përfundimtare të BRIKS-it.”, - theksoi zëvendësministri i Punëve të Jashtme i Iranit, Kazem Gharibabadi.

 

Takimi në Pekin vlerësohet si një nga kontaktet më të rëndësishme direkte mes dy fuqive në periudhën e fundit, në kushte të tensioneve të shtuara gjeopolitike dhe pasigurisë rreth krizës në Lindjen e Mesme, e cila po e shton më tej pasigurinë në marrëdhëniet Uashington - Pekin.