Përfundon vizita e presidentit Tramp në Kinë, “Tajvani”, pikë e ndjeshme në raportet ShBA - Kinë

 

“Diskutuam për Iranin. Kemi qëndrime të ngjashme. Duam që kjo të përfundojë. Nuk duam që ata të kenë armë bërthamore. Duam që ngushtica të mbetet e hapur. Kjo duhet të përfundojë, sepse situata nuk është e mirë. Nuk mund të lejohet armë bërthamore.”, - deklaroi presidenti i ShBA-së, Donald Tramp.

 

Gjatë një serie takimesh u nënshkruan edhe marrëveshje tregtare. Sipas njoftimeve, Pekini u pajtua të blejë naftë nga ShBA-ja dhe të porosisë 200 avionë “Boeing”.

 

“Kjo vizitë është historike dhe shumë e rëndësishme. Kemi vendosur një marrëdhënie të re bilaterale, një marrëdhënie strategjike me stabilitet konstruktiv. Kjo mund të quhet një pikë kthese.”, - theksoi presidenti i Kinës, Xi Jinping.

 

Në kuadër të bisedimeve është vendosur që në shtator Xi të vizitojë ShBA-në.                        

 

“Të dy palët duhet të zbatojnë konsensusin e arritur nga liderët dhe të sjellin më shumë stabilitet në bashkëpunimin ekonomik dhe tregtar, si dhe në ekonominë globale.”, - theksoi zëdhënësi i Ministrisë së Jashtme i Kinës, Guo Jiakun. 

 

Çështja e Tajvanit mbetet një nga temat më të ndjeshme. Xi Jinping ka theksuar më herët se ajo është çështja më e rëndësishme në marrëdhëniet ShBA - Kinë, ndërsa Uashingtoni konfirmon se politika e tij ndaj Tajvanit mbetet e pandryshuar.

 

“Do të ishte më mirë që Tajvani të vendoste vetë përmes një votimi ose referendumi. Do të ishte një gabim i madh të tentohej me forcë, sepse do të kishte pasoja globale.”, - u shpreh sekretari amerikan i shtetit, Marko Rubio.                                      

Delegacioni amerikan në Kinë përfshiu edhe drejtues të lartë të sektorit teknologjik. Pekini kërkon lehtësim të kufizimeve për eksportin e çipave të avancuar, ndërsa ShBA-ja kërkon që Kina të vazhdojë furnizimin me metale të rralla, të rëndësishme për industrinë automobilistike dhe atë ajrore amerikane.