Shkup, protesta e studentëve: Provimi i jurisprudencës në shqip, mbështetje nga hapësira mbarë shqiptare

Gjuha shqipe zyrtare, drejtësi, barazi, nuk ka shtet pa rini, gjuha shqipe nuk negociohet.

Këto ishin disa nga brohoritjet e protestës së studentëve të juridikut të tre universiteteve UT, UEJL dhe UNT, të cilët kërkuan zbatimin e provimit të jurisprudencës në gjuhën shqipe.

Studentët pjesërisht të bindur se qeveria do gjejë zgjidhje, ashtu siç u tha së fundmi. Në rast të mospërfilljes së kërkesave të tyre, ata thonë se nuk do të ndalen së protestuari.

“Tashmë e dijnë të gjithë se sa besim kemi te institucionet. Kemi shpresa të mëdhaja, nuk do të ndalemi deri sa të realizohet kjo e drejta jonë.”

“Nuk besojmë se zgjidhje gjindet një ditë para protestës. Është deshur që ta zgjidhin tabnimë njëzet vite dhe nuk e kanë zgjidhur dhe një ditë para protestës nuk mundet me u zgjidh.”

“Ligjin e kemi, në kushtetutë shkruan, është e garantuar me ligj dhe me kushtetutë, vetëm duhet të zbatohet. Presim rezultate të mira por do ta shohim në vazhdim.” – thanë disa nga studentët e intervistuar nga TVM2.

Protesta u përkrah nga qytetarë të qyteteve të ndryshme të Maqedonisë por edhe nga studentë nga Kosova dhe Shqipëria.

“Jemi një grup i Kosovës. Studentët e Kosovës i bashkëngjiten protestës së Maqedonisë  së Veriut. Jemi vetëm për qëllim solidariteti me studentët e Maqedonisë së Veriut.” – tha Alt Rexhepi, student nga Kosova.

“Protestat do të vazhdojnë deri në realizimin e të drejtave të popullit shqiptarë në Maqedoni.” – u shpreh një qytetarë nga Kosova.

“Patjetër të ketë zgjidhje. Ne jetojmë në një shtet ku ka demokraci dhe patjetër duhet të ketë zgjidhje për çdo gjë që na mungon.” – theksoi një qytetare nga Tetova.

Nuk mungoi as mbështetja akademike por edhe politike. Profesorë të universiteteve ishin prezentë si dhe përfaqësues të opozitës shqiptare. Marshimi nga ura e gurit përfundoi para Ministrisë së Drejtësisë, për ti adresuar edhe një herë kërkesat ministrit Fillkov për mbajtjen e provimit në gjuhën shqipe.

Ky është tubimi i dytë pasi studentët shqiptarë shprehën revoltën e tyre edhe në protestën e majit. (Meral Ismaili, TVM2)