Përplasjet për Bullgarinë, LSDM dhe VMRO me akuza të ndërsjella

 

 

“Patriotizmi nuk është krijimi i ndasive mes qytetarëve, izolimi nuk i sjell të mira asnjë populli. Patriotizëm i vërtetë është të sigurosh të ardhmen e shtetit, të mbrosh identitetin dhe të sigurosh vend të barabartë për Maqedoninë mes popujve evropianë. Integrimi në BE, në familjen e madhe evropiane të popujve të barabartë, është akti më i madh i patriotizmit dhe garancia më e fortë për të ardhmen e popullit maqedonas, gjuhës maqedonase dhe shtetit maqedonas”, deklaroi Bogdanka Kuzeska nga LSDM.

 

Nga ana tjetër,  partia në pushtet akuzon kryetarin e LSDM-së Venko Filipçe se është më i zëshmi në mbrojtje të qëndrimeve bullgare në Maqedoni. Sipas VMRO-DPMNE-së, Filipçe i promovon hapur pozicionet bullgare dhe ka të njëjtin qëndrim lidhur me ndryshimet kushtetuese si autoritetet bullgare, të udhëhequra nga Rumen Radev.

 

“Rubin Zemon, njeri i Zoran Zaev dhe një nga njerëzit më të afërt të Venko Filipçe, është lidhja mes Bullgarisë dhe LSDM-së. Rubin Zemon zhvilloi takim me Viktor Stojanov, personi që udhëheq Fondacionin “Maqedonia”, i cili përhap propagandë bullgare në vend dhe është person me ndalim hyrjeje në Maqedoni për shkak të qëndrimeve të tij antimaqedonase. Ja, ky është njeriu që bashkëpunon me LSDM-në dhe Filipçen pikërisht përmes njeriut të Zaevit, Rubin Zemon”, u shpreh Valentin Manasievski nga VMRO-DPMNE. 

 

Përndryshe përfshierja e komunitetit bullgar në Kushtetutë vazhdonë të mbetet kusht kyç për të vazhduar procesi euro-integrues i vendit.