Shembet një ndërtesë në Filipine, një i vdekur dhe 21 persona të zhdukur

Të paktën një person ka humbur jetën pasi një ndërtesë në ndërtim e sipër u shemb, në veri të kryeqytetit filipinas Manila, ndërsa 21 persona të tjerë rezultojnë ende të zhdukur.

Sipas autoriteteve lokale, ekipet e shpëtimit vijojnë operacionet intensive në vendngjarje, duke kërkuar për të mbijetuar nën rrënojat e ndërtesës shumëkatëshe.

Autoritetet kanë nisur hetimet për të zbuluar shkaqet e shembjes së objektit.

Në zonën e aksidentit, ekipet e emergjencës po përdorin qen, pajisje dhe makineri të rënda për të kërkuar mes grumbujve të betonit dhe çelikut të shkatërruar.

Autoritetet nuk kanë dhënë ende detaje mbi identitetin e viktimës apo gjendjen e personave të zhdukur, ndërsa operacionet e kërkim-shpëtimit pritet të vazhdojnë gjatë orëve në vijim.