Kurban Bajrami, Tirana dhe Prishtina me manifestime qendrore

 

“Bota sot po kalon sprova të mëdha, luftëra, varfëri, pasiguri dhe krizë shpirtërore. Edhe shoqëria jonë përballet me këto sfida. Por ne nuk duhet ta humbasim shpresën tek i madhi Zot. Besimtari është njeri që ngrihet edhe kur koha bëhet shumë e vështirë për atë.”, - deklaroi kreu i KMSh-së, Bujar Spahiu.

 

Presidenti Begaj uroi nga Meka për më shumë begati. “Ditë e bekuar, natë e ndritshme!” ishte postimi i Ramës në rrjetet sociale.

 

Ndërkohë ceremonia qendrore e faljes së namazit të Kurban Bajramit në Kosovë u mbajt në Xhaminë e Madhe në Prishtinë, me mesazhe për paqe, solidaritet, harmoni dhe dashuri ndërmjet besimtarëve. Myftiu i Kosovës, Naim ef. Tërnava, ka theksuar nevojën për stabilitet institucional dhe përgjegjësi shtetërore, duke paralajmëruar për pasojat e zgjedhjeve të shpeshta në vend.

 

“Për të ndërtuar këto ideale të larta, vendi ynë ka nevojë, përveç stabilitetit ekonomik dhe politik, edhe për institucione funksionale dhe përgjegjësi shtetërore. Fatkeqësisht, interesat e ngushta grupore dhe përplasjet e pafundme politike të partive tona kanë lodhur qytetarët tanë dhe kanë krijuar pasiguri për të ardhmen. Mbajtja e zgjedhjeve të njëpasnjëshme, mungesa e unitetit institucional dhe polarizimi politik nuk i shërbejnë Kosovës, por e dobësojnë besimin qytetar dhe e zbehin shpresën e brezit të ri.”, - theksoi myftiu i Kosovës, Naim ef. Tërnava.

 

Urime për festën e Kurban Bajramit kanë drejtuar edhe ushtruesja e detyrës së presidentes, Albulena Haxhiu, dhe kryeministri në detyrë, Albin Kurti, me urimet për kultivimin e vlerave për të mirën e përgjithshme.