ShBA-ja sulmon ishullin Qeshm, Teherani përgjigjet me raketa

 

Komanda Qendrore e Ushtrisë Amerikane (CENTCOM) njoftoi se ka kryer sulme që i cilësoi si veprime vetëmbrojtëse ndaj objektivave iraniane në ishullin Qeshm, pranë Ngushticës së Hormuzit. Sipas ushtrisë amerikane, sulmi në ishullin Qeshm kishte në shënjestër një stacion ushtarak kontrolli tokësor. Gjithashtu, forcat amerikane raportuan se rrëzuan tre dronë sulmues të nisur nga Irani, të cilët, sipas tyre, përbënin kërcënim për anijet civile që lundronin në ujërat rajonale.

 

Garda Revolucionare Iraniane reagoi ashpër, duke paralajmëruar se çdo përpjekje për të cenuar sigurinë e Ngushticës së Hormuzit do të ketë pasoja të rënda për ushtrinë amerikane. Përshkallëzimi i situatës vjen në një moment kur përpjekjet diplomatike për një marrëveshje armëpushimi dhe rifillimin e negociatave për programin bërthamor iranian nuk kanë dhënë rezultat. Mospajtimet mes palëve mbeten të thella, veçanërisht mbi çështjen e pasurimit të uraniumit dhe sigurinë në Ngushticën e Hormuzit.